12. என்னைப் பற்றி நான் - தேனம்மை லெக்ஷ்மணன்

இந்த வாரம் 'என்னைப் பற்றி நான்' பகுதியில் தன்னைப் பற்றிச் சொல்கிறார்... தேனம்மை லெக்ஷ்மணன்... வலையுலகில் பலருக்கு தேனு... என்னைப் போன்றவர்களுக்கு தேனக்கா.

பிரபல பத்திரிக்கை எழுத்தாளர்... பல புத்தகங்கள் எழுதியவர்... என்பதை எல்லாரும் அறிவோம் என்பதால் இவரைப் பற்றி அதிகம் சொல்லத் தேவையில்லை. வலையுலகில் பிரபலம் இவர்.

இவர் தனது 'சும்மா' வலைப்பக்கத்தில் சாட்டர்டே ஜாலி கார்னர் என்று ஒரு பதிவு வெளியிட்டு வருகிறார். வலையுலக நட்புக்களிடம் ஏதாவது ஒன்று குறித்துக் கேட்டு அதை சனிக்கிழமை தோறும் வெளியிட்டு வருகிறார். அந்த ஜாலி கார்னரில் அடியேனும் 2014-ல் எழுதியிருக்கிறேன். அப்போது அக்கா கேட்டு நீண்ட நாட்களுக்குப் பிறகே எழுதிக் கொடுத்தேன். ஊருக்கு பயணப்பட இருந்த நேரத்தில் கேட்டார்... எப்படி எழுதுவது... இரண்டு முறை ஞாபகப்படுத்த மின்னஞ்சல் விட்டதும் ஊரில் இருந்து எழுதி அனுப்பிக் கொடுத்தேன். நான் கேட்டதும் அதை எல்லாம் மனதில் வைக்காது நேரமில்லை தம்பி முடியும் போது எழுதித் தர்றேன் என்றார்... எழுதிக் கொடுத்துவிட்டார்.

பல சிறுகதைகள், கவிதைகளுக்கு பரிசுகளை வென்றவர்... நிறைய எழுதக் கூடியவர். தேனக்காவிடம் பிடித்த ஒன்று வலையுலக நட்புக்களுக்கு கவிதை, கட்டுரை, சிறுகதை போட்டிகள் குறித்த விபரங்களை பதிவாக எழுதி தெரிவிப்பதுதான்... நான் வலையில் அடி எடுத்து வைத்தது முதல் என் பதிவின் வாசகி... என்ன கருத்துத்தான் எழுதமாட்டார்...

மற்றபடி இவரைப் பற்றி எல்லாரும் அறிந்திருப்பீர்கள்... அக்காவுக்கு நம்ம மீது ஊர்ப்பாசம் கொஞ்சம் அதிகம்... எங்க ஊர் ஆச்சியில்ல... பாசம் கூடுதலாக இருக்கத்தானே செய்யும்.

நான் காரைக்குடிக்காரியாக்கும் என்று அடிக்கடி கம்பன் விழா, கண்ணதாசன் விழா என பதிவுகள் எழுதி நிரூபித்துவிடுவார்.

அப்படியே ஒரு விளம்பரம் அக்காவின் தளத்தில் எனது 'சாட்டர்டே ஜாலி கார்னர்' வாசிக்க இங்கு சொடுக்குங்க...

இனி அவரைப் பற்றி என்ன சொல்றாருன்னு பார்க்கலாம் வாருங்கள்....

முதலில் என்னைப் பற்றி நான் எழுத அழைத்த சகோ குமாருக்கு நன்றி. ஏன்னா சமீபகாலமாகத்தான் என்னைப் பற்றி நான் அதிகமா சிந்திச்சிக்கிட்டு இருக்கேன். என்ன செய்திருக்கேன். செய்ததெல்லாம் உருப்படியா செய்திருக்கேனா, இன்னும் என்ன என்ன செய்யணும்னு எல்லாம். தொடர்ந்து வலை உலகில் செயல்பட்டுவரும் ( கிட்டத்தட்ட 100 பேர் இருப்போம் ) வலைப்பதிவர்களை ஊக்குவிக்கும் விதமா இந்தப் பதிவு அமைந்திருப்பதுக்கு முதலில் பாராட்டுகள் குமார் சகோ. குமார் சகோவின் சிறுகதைகள் மிக அருமையா இருக்கும் அதுக்கும் பாராட்டுகள் சகோ.

நான் இல்லத்தரசி. 2009 ஜூலை 13 ஆம் தேதியில் இருந்து சும்மா என்ற வலைப்பூவில் எழுதிட்டு வரேன். இதுக்குப் பேர் வைக்கும்போது என் மூத்த பிள்ளை சொன்னது மறக்க முடியாது. சும்மா வெட்டியாத்தானே வீட்டுல இருக்கீங்க அதுனால சும்மான்னு வைப்போம்னு. நானும் பூம் பூம் மாடு மாதிரி தலையாட்டினேன். ப்லாகில் எழுதினால் போதும்னு J

அப்புறம் கோலங்கள், சமையல் குறிப்புகள், டைரிக் கிறுக்கல்கள்னு இன்னும் 4 ப்லாகுல எழுதிட்டு இருக்கேன். CHUMMA அப்பிடின்னு ஆரம்பிச்சது இப்போ ஆங்கில சமையல் ப்லாகா பாதில நிக்குது. சும்மாவைத் தொடர ஊக்கம் கொடுத்த வலைத்தள நட்புகள் லிஸ்ட் பெரிசு. இராகவன் நைஜீரியா, விஜய், நேசன், பாரா, சங்கர்ஜி, ஐ எஸ் ஆர் செல்வகுமார், சுரேஷ் சூர்யா, டிடி, முனியப்பன் சார், சீனா சார், விஜிகே சார், தமிழ் உதயம், ஆர் ஆர் ஆர், ராமலெக்ஷ்மி, சாந்தி, துளசி, வல்லிம்மா, ரமணி சார், வெற்றிவேல் சார், மேனகா, ஆனந்தி, ஹேமா, கலையரசி, சரஸ்மா, யாழ்பாவண்ணன் சகோ , பகவான் ஜி, கில்லர் ஜி, குமார் சகோ, வெங்கட் சகோ, ஜெயக்குமார் சகோ, பாலா சார், ஸ்ரீராம், கீதா மேம், விஸ்வநாத், ஜம்பு சார், துளசி சகோ, கீதா, கீத்ஸ், செந்தில் சகோ, நவாஸ் சகோ, அக்பர் சகோ, ஜமால் சகோ, ப்ரகாஷ் சகோ, இளங்கோ சார், நாகேந்திர பாரதி சகோ, சுரேஷ் சகோ, இன்னும் பலருக்கு நான் நன்றிக்கடன் பட்டிருக்கேன்

அப்புறம் நண்பர் ஐ எஸ் ஆர் செல்வகுமார் கொடுத்த ஊக்கத்தால் பத்ரிக்கைகளுக்கு எழுத ஆரம்பிச்சேன். பத்ரிக்கைகளுக்குக் கவிதை கதை கட்டுரை மட்டுமில்ல சமையல் குறிப்புகளும் கோலங்களும் எழுதி இருக்கேன். நிறையப் பிரபலங்களை நேர்காணல் & பேட்டி எடுத்திருக்கேன். மருத்துவ விழிப்புணர்வு பற்றிய பேட்டிகளும் எடுத்திருக்கேன். ப்லாகர் என்று போட்டே பல நிகழ்ச்சிகளுக்கு சிறப்புப் பேச்சாளரா அழைக்கப்பட்டிருக்கேன் என்பதே சந்தோஷம். தேனு, தேனம்மைலெக்ஷ்மணன், ஆண்டாள், தேனாஞ்சி, சபா வெங்கட், கோதை என்ற பெயர்களில் எல்லாம் எனது படைப்புகள் வெளியாகி இருக்கின்றன.

ஒரு மூணு ஆசையை வீட்டுல சொல்லி இருக்கேன். அது குறித்து இங்கேயும் பிரஸ்தாபிக்கிறேன். ஜெயாம்மா கையால விருது வாங்கணும்னு நினைச்சேன். அப்புறம் சங்கர் டைரக்‌ஷனில் ஏ ஆர் ரஹ்மான் இசையமைப்பில் ஒரு சினிமா பாடல் எழுதி அது உலகப் புகழ் பெறணும்னு. மூணாவதா சாகித்ய அகாடமி விருது வாங்கணும்னு. ஹாஹா முதல் ஆசை கோவிந்தா கோவிந்தா. அம்மா இலக்கிய விருதைக் கூட வாங்க முடியுமா தெரில. அடுத்து சங்கர் இப்ப படம் எடுக்கிறாரா என்னன்னே தெரில. மூணாவதா இப்பிடி என்னோட சொந்த ப்லாக் மொக்கைகளிலேயே தினம் தினம் குளிச்சு எந்திரிச்சுப் பொழுதைக் கழிக்கும்போது ஆழ்ந்த ஒரு பொருளைப் பற்றி நாவல் எழுதி அது சாகித்ய அகாடமி விருது வாங்கி… ஹ்ம்ம். இருந்தாலும் நான் நம்பிக்கையைக் கைவிடலை. எப்பவாவது இது மூணும் நிகழக் கூடிய சாத்யக்கூறு இருக்கு. அதுக்குத் தகுந்த சூழலை நான் உருவாக்கிக்கலை, என்னை மேம்படுத்திக்கலைன்னே சொல்வேன். சரி முயற்சிதானே வாழ்க்கை. மெல்ல முயல்வோம்.

எதிர்காலத் திட்டம்னா தொடர்ந்து ப்லாக் எழுதணும். இன்னும் மேம்படுத்தப்பட்ட படைப்புகளோட எல்லாரையும் சந்திக்கணும். இன்னும் பல நாடுகள் பல உணவுகள் பற்றி எழுதணும். ப்லாக் எழுத்தின் மூலமே பெருந்தலைகளை அசைக்கும் வல்லமை பெறணும். அவ்ளோதான். 

என்னைப் பற்றி நான் எழுதி என் மனோ வியாகுலங்களையும் மனோ ராஜ்ஜியங்களையும் வெளிப்படுத்த இடம் கொடுத்த சகோ பரிவை சே குமார் அவர்களுக்கு நன்றியும் அன்பும்.

நன்றி...

நட்புடன்,

தேனம்மை லெக்ஷ்மணன்.

என்னைப் பற்றி நான் தொடர் வாராவாரம் மெருகேறிக் கொண்டே செல்வதற்கு நீங்கள்தான் காரணம் என்பதை வாராவாரம் சொல்ல வேண்டும் என்பதில்லை என்ற போதிலும் இத்தொடர் தொடர்ந்து பனிரெண்டு வாரங்கள் போகும் என்றெல்லாம் நினைக்கவில்லை. ஆரம்பத்தில் மின்னஞ்சல் அனுப்பிக் கேட்ட பத்துப்பேரில் பலர் தராத நிலையில் அடுத்தடுத்து கேட்கக் கேட்க மற்றவர்கள் கொடுத்து உதவ, இதுவரை பதிவு நிறுத்தப்படாமல் சென்று கொண்டிருக்கிறது. மகிழ்ச்சி.

இந்த மகிழ்ச்சி அனைத்தும் இதுவரை எழுதிக் கொடுத்த, இனி எழுதிக் கொடுக்க இருக்கிற, வாசித்து கருத்துக்களை வாரிக் கொடுத்த அனைத்து உறவுகளையுமே சாரும்... அனைவருக்கும் நன்றி.

இன்னும் மூன்று வாரத்துக்கான பதிவு கைவசம் இருக்கிறது. பதிவு என் கைக்கு வந்ததும் எத்தனாவது பதிவு என எண் மற்றும் பெயரோடு சேமித்து வைப்பதால் யார் அனுப்பினாலும் இத்தனாம் தேதி தங்கள் பதிவு வரும் என்று மின்னஞ்சல் அனுப்பிவிடுவேன். அதன்படி செல்வா அண்ணன் பதிவு தவிர மற்ற பதிவுகள் பதியப்பட்டு வந்திருக்கின்றன. இனியும் இந்த நடைமுறை தொடரும்.

ஊருக்குப் போனாலும் 'என்னைப் பற்றி நான்' பதிவுகள் மட்டும் தொடர்ந்து வரும்.

நன்றி.

-அடுத்த வாரம் மற்றொரு வலைப்பதிவர் தொடர்வார். 

-'பரிவை' சே.குமார்.