ராசாவே என் ராசாவே

களத்துமேட்டுக் காவலுக்கு
நீ கருப்பராட்டம் போனாலும்
கனத்த மனசோட
காத்திருப்பேன் என் ராசாவே...

திருவிழாத் தேரோட்டம்
தெருவிலோ மக்கள் கூட்டம்
வடம் பிடிக்கும் உன்னை
ஆவலோடு தேடுவேன் என் ராசாவே...

கண்மாய்த் தண்ணி எடுக்க
தனியே நான் வரும்போது
கொடுக்காப்புளி மரத்தருகே
நீ கொடுத்த முத்தச்சுவை
கொடுக்காப்புளி காயாட்டம்
தொண்டைக்குள்ளே இனிக்கவே
ரசித்து ருசித்தேன் என் ராசாவே...

விறகு உடைத்து வேர்த்து
வெயிலில் வைரமாய் மின்னும்
உன் தேகத்தின் மீது
கடந்து போகும் என் கண்கள்
தேங்கி நிற்க புன்னகையோடு
தேகம் பருகுவேன் என் ராசாவே...

ராசாவே என் ராசாவே
சிலம்பம் சுற்றும் போதும்
இளவட்டக்கல் சுமக்கும் போதும்
கபடியில் கால்தூக்கி ஆடும் போதும்
மாடு பிடித்து மகிழும் போதும்
எனக்கானவன் நீ என்றும்
உனக்கானவள் நான் என்றும்
பெருமை பொங்க
காத்திருந்தேன் என் ராசாவே....

வாக்கப்பட்டு நாளாச்சு...
வருசமும் ஓடிருச்சு...
வாரிசும் வந்திருச்சு...
அருகிலிருப்பேன்னு
ஆசைப்பட்டு வந்தவ...
வாழ்க்கைப் பசிக்காக
பொருள் தேடி தூரதேசம்
போன உன்னை
தினம் தேடுகிறேன்
சீக்கிரம் வா என் ராசாவே...

படம் : இணையத்திலிருந்து...

-'பரிவை' சே.குமார்.