மனசுக்குள் நுழைந்தவர்கள்..!..

சனி, 20 ஜூலை, 2019



பிக்பாஸ் : அழுகாச்சி காவியம்

Image result for பிக்பாஸ் - 3 லாஸ்லியா
பிக்பாஸ் சீசன் -3 சாக்லெட் சண்டை விஸ்வரூபம் எடுத்துக் கொண்டிருக்கும் போதே முந்தைய பதிவில் சொன்னது போல் கடிகார அலாரத்தை அடக்கும் போட்டியில் தான் மிகச் சிறப்பாக விளையாண்டதாகவும் சாண்டி அண்ணன் சூப்பரா விளையாண்டதால நீ போயிருக்க வேண்டியதில்லை என்று கவின் சொன்னது தன்னை ரொம்பப் பாதித்திருப்பதாகவும் மக்கள் மத்தியில் இந்தப் பொண்ணு ஒண்ணத்துக்கும் லாயக்கில்லை என போட்ராய் பண்ணப்படுகிறேன் என்றும் மீரா அழுகாச்சி காவியத்தைத் தொடர, ஷெரின் மற்றும் ரேஷ்மா ஆறுதல் சொல்லி தலைவி சாக்சியிடம் சொல்ல, அகப்பட்டவன் கவின் என்பதால் மீராவுக்குத் தோள் கொடுத்து அவனைச் சாய்ப்போம் என முடிவெடுத்து முதலில் சாண்டி, கவின் கிட்ட பேசுன்னு தூபம் போட்டுச்சு... ஆனா மீரா 'ஆதெல்லாம் இல்லா... நான் அல்லார்க்கிட்டயும் சூப்பர் பவருல்ல போண்ணு... நாந்தான் இங்க நல்ல்ல்லா வெள்ளாடுறேன்னு சோலோணும்'ன்னு சொல்ல, செயல் விளக்க பொதுக்கூட்டம் போட முடிவானது.

இதற்கு முன்னே 'மச்சான்... நான் ஜாலிக்குத்தான் சொன்னேன்... அது உன்னைப் பாதிச்சிருச்சு... மன்னிச்சிக்க' அப்படின்னு கவின் மன்னிப்பும் கேட்டு, மோகனைப் போல முத்தமெல்லாம் கொடுக்காமல் கையோடு கை குத்தி சமாதானக் கொடி நாட்டிட்டுத்தான் குளிக்கப் போனான். திரும்பி வரும்போது பொதுக்கூட்ட ஏற்பாடு, 'என்ன மச்சான்... இப்பத்தானே மன்னிப்பெல்லாம் கேட்டேன்... மறுக்காத் தூக்கிட்டு வந்திருக்கே... உனக்கு இப்ப என்ன பிரச்சினை'ன்னு கவின் கேட்க, 'இல்லா மாச்சீ... எல்லார் முன்னாலயும் நாந்தான் அந்தக் கடிகாரத்துக்கிட்ட போனேன்... சாண்டிக்குத்தான் எல்லாக் கிரிடிட்டும் போகுதுன்னு வெளக்கமாச் சோலோணும்.... அதான்' அப்படின்னு பஞ்சாயத்தைக் கூட்டிட்டு போற போக்குல 'மாச்சீ நா பேசோனுமுன்னுதான் சொனேன்...சாக்சிதான் இந்தக் கூட்ட ஏற்ப்பாடெல்லாம்'ன்னு பிட்டைப் போட்டுவிட, ஏழரை பனை மர உச்சியில ஏறிக்கிட்டு கள்ளுக்குடிக்க ஆரம்பிச்சிருச்சி.

சாக்சி பேச, மீரா பேசியதையே பேச, எல்லாரும் பேச, உடும்பு மாதிரி பிடிச்ச பிடியை விடாமல் 'மாச்சீ... நான் இதைச் சொன்னேன்.. அப்புறம் நீ இதைச் சொன்னே'ன்னு தேஞ்ச ரெக்கார்ட் மாதிரி மீரா பேச... ஒரு கட்டத்துல சாக்சி 'நீ என்ன லூசாப்பா... இல்ல லூசு மாதிரி நடிக்கிறியாப்பான்னு கேட்டதும் மீரா எப்பவும் போல் படுக்கையில் விழுந்து சரியாக கேமராவில் முகம் தெரிவது போல் படுத்து கண்ணீரைக் கக்கிக் கொண்டிருந்தது.

சாக்லெட் பிரச்சினையில் லாஸ்லியாவுடன் கவின் பேச, நான் வெளியில வந்துட்டேன்... எனக்கு எந்தப் பிரச்சினையும் இல்லை... நீ சாக்சிக்கிட்ட பேசுன்னு சொல்லிட்டு லாஸ் போக... கவின் மீண்டும் சாக்சியிடம் பேச, அவளும் முறுக்கிக் கொண்டே நிற்க, பாத்ரூமிற்குள் இருப்பவளுக்காக கதவுக்கு வெளியே தேவுடு காத்து நின்றான். அவ உள்ள அழுக , அங்க வந்த லாஸ் எதுவும் தெரியாதுபோல நீ இப்ப சரியாயிட்டேல்லன்னு சொல்லிட்டுப் போக, அப்புறம் ஷெரின் வந்து சாக்சிக்கிட்ட பேசி, பாத்ரூமுக்குள்ள போயி ஆறுதல் சொல்லி, வெளிய வந்த சாக்சி நான் சரியாயிட்டேன்... நீ போயி சாப்பிடு என ஒரு பிட்டைப் போட, மீண்டும் லாஸ்சுடன் பேச... சாக்சி தூக்கம் வராது தவிக்க... இந்தக் கதைதான்யா ரொம்ப நேரமாத் தொடர்ந்துச்சு... பயபுள்ள நான் உங்களை லல்வலைடின்னு சொல்லித் தொலையாம மச்சான் மச்சான்னு ராவெல்லாம் சுத்துறான்.

மறுநாள் காலையில பிக்பாஸ் 'ஊருவிட்டு ஊருவந்துன்னு ' டைமிங்கா பாட்டுப் போடுறாராம்... எப்பவும் ஆடுறவங்க ஆடலை... கவின் எழவே இல்லை... சாண்டியோட சாண் டவுசரைப் போட்டுக்கிட்டு சாக்சிதான் ஆடுச்சு... அப்புறம் இந்தக் கருமாந்திரம் புடிச்ச சாக்லெட்டும் கடிகாரமும் சுற்றிச் சுற்றியே வந்துச்சு. பிரச்சினைக்கான முடிவு எட்டப்படவேயில்லை. இதுல இடையில எப்பவாச்சும் சரவணன் கம்பு சுத்துவாரு... அவருக்கு சேரனைப் பாத்தால் பத்திக்கும்... மோகனுக்கு சரவணனைப் பார்த்தால் பத்திக்கும்... இப்படிப் போன நாள்ல அடுத்த இரண்டு சுற்று கடிகார அலாரத்துல கலந்துக்கிட்டவங்க வெற்றி பெறலை என்பதால் மொத்தம் 1200 மார்க்த்தான் வாங்குனாங்க... அதுலயும் ஒவ்வொரு ஆளா சிகரெடு குடிக்கிற வச்சிருக்கிற தபால் பெட்டிக்குள்ள போகணுங்கிறதுதான் சட்டம்... கூட்டமாப் போயி குப்புக்குப்புன்னு ஊதக்கூடாதுன்னு எத்தனை வாட்டி சொல்லியிருக்கேன். கேக்க மாட்டேங்கிறீங்களேன்னு பிக்பாஸ், தலைவி சாக்சி செய்த தவறுக்காக 100 மார்க்கை ஆட்டையைப் போட்டுட்டாரு... அப்ப 1100 மார்க்குத்தான் இந்த வார பட்ஜெட்டுக்கு.... 2400க்கு மேல மார்க் வாங்கி பட்ஜெட்ல பக்காவா வாங்கித் தின்னவங்க அதுல பாதிக்கு எப்படி வாங்கித் திம்பாங்கன்னு நமக்குத் தோணுனாலும் மார்க்ப்படித்தான் கொடுக்கப்படும்ன்னு நம்பிக்கிட்டு இருந்தோம்ன்னா நம்மளை மாதிரி லூசு யாருமில்லை.

அப்புறம் நல்லா வெளாண்டவங்க ஆருன்னு பிக்பாஸ் கொக்கியைப் போட, ரேஷ்மா, சாண்டி அப்புறம் சரவணன்னு சொல்ல சிலர் சேரன்னு சொன்னாங்க... உடனே நம்பிக்கை வாக்கெடுப்பு... சரவணனுக்கு ஆறு... சேரனுக்கு அஞ்சு... உடனே தலைவி சாக்சி என் வாக்கை சேரனுக்குப் போடுறேன்னு சொன்னதும் உலகக் கோப்பை பைனல் மாதிரி திக்திக்குன்னு சூப்பர் ஓவருக்குப் போயிருச்சு...தன்னோட ஓட்டு தனக்கே என சரவணன் சொல்ல, என்னோட ஓட்டும் உனக்குத்தாய்யா என சேரன் சொல்ல, சரவணன் இந்த வாரத் தலைவருக்கான இருவரோடு மூவரானார். தனக்கான எதையும் சரவணன் விட்டுக் கொடுப்பதில்லை எப்போதும். சேரன் எதிரி என்பவர் எதிரியின் ஓட்டு எனக்குத் தேவையில்லை என்று சொல்லவேயில்லை.

அப்புறம் யாருடா நல்லாவே விளையாடலைன்னதும் சாக்சி, மீரா பெயர் சொல்ல, சிறைக்கு அனுப்பப்பட்டார்கள். ஆஹா... அடிச்சி ஆட சரியான ஆளுகளைத்தான் கூண்டுக்குள்ள போடுறாங்கன்னு தோணுச்சு. அங்க சாக்சியோட மற்றவர்கள் பேசப்பேச, மீராவுக்குள் சுனாமி சுழல ஆரம்பிக்க, பேசிக்கிட்டே இருக்காங்க... எரிச்சலா இருக்குன்னு சொல்லிட்டு பாத்ரூமுக்குள்ள போயி படுத்துக்கிச்சு... வெளிய வரவே இல்லை... பிக்பாஸ் அந்தப்புள்ள என்னாச்சுன்னு கத்த, சாண்டியோ உள்ள பால் உருட்டி விளையாடும்ன்னு சொன்னதும் சேரன் அங்க எந்தப் பாலையை உருட்டி விளையாடும்ன்னு கேட்டு வைக்க, சாண்டியோ தியானம் பண்ணும் என்பதாய் முடித்து வைத்தார்.

பாட்டரி மாத்தும்மான்னு பிக்பாஸ் மீராவை வெளியே கொண்டு வர, கேமராவுக்கு முன்னால போயி நான் ரொம்ப நல்லவ... எல்லாரும் என்னைய படையப்பா ரம்யா கிருஷ்ணனாப் பாக்குறாங்கன்னு சீனைப் போட்டுச்சு... அப்புறம் 'உன்னை விட்டால் யாருமில்லை' அப்படின்னு சாக்சியும் மீராவும் பேச, நேத்து என்னா நந்துச்சுன்னா... கவின்... அலாரம்... சாண்டி... நீ... நான்.... ரேஷ்மா... அப்ப நீ கூட... நான் இதை... அப்ப நீ அதை... அப்படின்னு மறுபடியும் ஆரம்பிச்சி எப்பவோ செத்துப்போன எங்க ஆயாவை சாவுறதுக்கு முதநாளு நீ லூசுன்னு திட்டுனியேன்னு வந்து நின்னுச்சு... இடையில ரேஷ்மா, ஷெரினெல்லாம் பேசியும் மீரா மீட்டுவதைவிடவில்லை... இந்தச் சண்டையில் கொஞ்ச நேரம் பாத்ரூமுக்குள் மகிழ்வாய் ஆட்டம் போட்டான் கவின். அப்புறம் சாக்சி அழ, எல்லாரும் ஆறுதல் சொல்ல... சேரனும் போனது சரவணனுக்கு சாண்டிக்கும் பிடிக்கலை... சண்டையப்போ எங்கோ போனானுங்கன்னு சொன்ன அவங்க ரெண்டு பேரும் வேடிக்கைதான் பார்த்தாங்க.... இங்க யாருமே எதையும் கண்டுக்கிறதில்லைன்னு ரேஷ்மா சொன்னப்போ ஆமாமா யாருமே கண்டுக்கிறதில்லைன்னு ஏதோ இவங்க ரெண்டு பேரும் எல்லாப் பிரச்சினையிலும் முன் நிக்கிறமாதிரி தலையாட்டுனாங்க.

அப்புறம்... அப்புறம்... சரி இதே புராணத்தை எவ்வளவு நேரம்தான் பேசுறது... கவினிடம் பேசிய சேரன் ரெண்டு பொண்ணுங்களோட மனசையும் நீ பாதிச்சிருக்கே.... இப்ப உன் மேல இருக்க அழுக்கைக் கழுவ, உன்னைய எல்லாரும் புறம் பேசாம இருக்க எல்லார் முன்னாடியும் உன்னோட நிலை என்னங்கிறதை எடுத்துச் சொல்லு... விரிவாப் பேசுன்னு சொல்லலை... பட் கொஞ்சமாவது பேசினால் நல்லாயிருக்கும்ன்னு சொல்ல, அதை அறிந்த சாண்டி எல்லார்க்கிட்டயும் எதுக்கு நீ சாரி கேக்கணும்ன்னு குதிச்சார். அப்புறம் கவின் என்ன நினைத்தானோ எல்லார்க்கிட்டயும் நான் விளையாட்டாத்தான் விளையாண்டேன்... இம்புட்டுத்தூரம் வந்திருச்சுன்னு சொல்லி சாரி கேட்டுட்டு, சாக்சிக்கிட்ட பேச நினைக்க, அவ முறுக்க... பய பாத்ரூம்க்குள்ள போயி கேவிக்கேவி அழுக ஆரம்பிச்சிட்டான்... அப்புறம் ரேஷ்மா, சாண்டி, முத்த  அப்பா மோகன் எல்லாம் சமாதானம் பேச, என்னைய விடுங்கடா வீட்டுக்குப் போறேன்னு நின்னான். சாக்சி பேச வர, வேண்டான்னு சொல்லிட்டான். 

ரெண்டு பொண்ணுங்களின் உணர்ச்சியோட விளையாண்ட கவின், சாக்சியை லவ்வியது உண்மையே என்பது வெட்ட வெளிச்சமாகிறது. அதேபோல் இங்க எப்பவும் போல் இருக்கலாம்... வெளியில போயி லவ்விக்கலாம்ன்னு பயபுள்ள சொல்லியிருக்கு... அப்புறம் லாஸ்வியாவோட நடத்தை, வெளியில் இருக்கும் மக்கள் செல்வாக்கு, சாக்சியோட அடிக்கடி மாறும் மனநிலை என எல்லாமாய் சாக்சியை விடுத்து லாஸ்லியாவை லவ்வச் சொல்லியிருக்கு... அதைத்தான் சாக்சியும் சேரனும் சொல்றாங்க.... ரெண்டு குதிரையை ஓட்டிட்டு மச்சான்... மச்சான்னு சொல்லிக்கிட்டு திரிஞ்ச குற்றவாளி கவின்தான் என்பதால் அதை உணர்ந்தே எஸ்கேப் ஆகப் பார்க்கிறான்... அதுக்கே இந்த அழுகை சீனெல்லாம் என்றாலும் ஆம்பளை கேவிக்கேவி அழுததெல்லாம் வருத்தமாத்தான் இருந்துச்சு.

சேரன் சொன்னதுதான் தப்புன்னு சாண்டி ஒரு பக்கம் எல்லார்க்கிட்டயும் ஏத்திவிட்டுக்கிட்டு இருக்கார்... அவரும் எத்தனை நாள்தான் வடிவேலாவே இருக்கிறது... ரகுவரன் ஆக வேண்டாமா...? சேரனோ நான் எல்லார்க்கிட்டயும் பொதுப்படையாப் பேசு... அப்பத்தான் உம்மேல அவங்க வச்சிருக்கிற கெட்ட எண்ணம் மாறும்ன்னுதான் சொன்னேன்... சாரி கேளுன்னு சொல்லவே இல்லை என ரேஷ்மா, சாக்சியிடம் சொல்லிக் கொண்டிருந்தார். அதுதான் உண்மையும் கூட... அதை ஏன் கவின் சொல்ல மறுக்கிறான்னு தெரியலை.

இதுக்கு இடையில லாஸ்லியாவோட பேசுற கவின், ஏம்மச்சான் தள்ளி உக்காந்திருக்கே... கிட்ட வான்னு சொல்றான். அப்பவும் அவனுக்கு கிளுகிளுப்புக் கேக்குது... கொய்யால... அந்தப்புள்ளயும் நான் வெளிய வந்துட்டேன்... சாக்சிகிட்ட பேசு... ரெண்டு பேரோட உணர்ச்சி கூட உன்னால எப்படி விளையாட முடிஞ்சது... சாக்சிக்கிட்ட பேசுனப்போதான் உன்னோட உண்மை முகம் தெரிஞ்சது... நான் வெளிய வந்துட்டேன்... எங்கிட்ட சாரி கேக்காத... அதை நான் ஏத்துக்க மாட்டேன்னு... தன்னோட காதலை மறைத்து அப்படி ஒண்ணு இல்லமே இல்லைன்னு சிவாஜி மாதிரி நடிச்சிச்சு... ஆனா கையை உடம்புல போட்டு தேய்த்த தேய்ல அதோட வலி தெரிஞ்சிச்சு.

இதுக்கு இடையில நீயா நானா போட்டி வேற... நடுவர் மீரா... எப்படி நடந்திருக்கும்ன்னு நீங்களே முடிவு பண்ணிக்குங்க... இந்த மீராவை வலுக்கட்டாயமாவாச்சும் பிக்பாஸ் வெளியேத்தணும் இல்லேன்னா டிஆர்பி உயரத்துல பறக்கும்ங்கிற கனவுல மண்ணுதான் விழும். மீரா பேச ஆரம்பித்தாலே தியேட்டர்ல பாட்டு வந்ததும் பாத்ரூம் போற மாதிரி எந்திரிச்சிப் போக வேண்டியிருக்கு.

இத்தனை கலவரத்துலயும் கட்டிக்கொடு மோகன் லாஸ், சாக்ன்னு தன்னோட கடமையை நிறைவேற்றிக் கொண்டதுடன் கூடுதலாய் கவினுக்கும் கொடுத்து நாளொன்றுக்கு மூன்று என்ற தனது கணக்கை நிறைவாய் பூர்த்தி செய்து கொண்டார்.

நடிப்பே என்றாலும் இரண்டு பெண்களின் உணர்ச்சியுடன் விளையாண்டது மிகப்பெரிய தவறு என்பதை கவின் உணர்வதாய்த் தெரியவில்லை... இவ இல்லேன்னா அவ என்பதில் இருந்து அவன் வெளிவர நினைக்கவில்லை... இந்தக் காதல் கதை இன்னும் தொடரத்தான் செய்யும்... பின்னே பிக்பாஸ் விடுவாரா என்ன... அவரே எதிர்பார்க்காத திரைக்கதையாகக் கூட இது இருக்கலாம். பாவம் இரண்டு பெண்களும் தூக்கத்தைத் தொலைத்து அலைகிறார்கள்... அதுவும் ஆடிக்கொண்டு திரிந்த லாஸ்லியாவின் சோக முகம் பார்க்கச் சகிக்கலை.

இதுல லாஸ்லியாவின் செயலால் பாதிக்கப்பட்ட ஷெரின், மூணு நாளைக்குப் பிறகு மூக்கால அழுது... என்னத்தைச் சொல்ல... கேமராவை எம்பக்கம் திருப்புங்கப்பான்னு ஆளாளுக்கு அழ ஆரம்பித்ததில் மது, அபிராமியெல்லாம் வீட்டுக்குள் இருக்காங்களான்னே தெரியாமப் போச்சு... ரேஷ்மா கவின் விஷயத்தில் மிகத் தெளிவாய்ப் பேசுவது சிறப்பு.  

சாண்டி எல்லாம் வேடிக்கை மட்டுமே பார்க்கும் நபராய் இருத்தல் தனக்கான பாதுகாப்பு என்று நினைத்தாலும் இதுவும் தொடர்தல் நல்லதல்ல.

நேற்றும் இன்றும் என்ன நிகழ்ந்தோ தெரியவில்லை... இன்று ஆண்டவரின் வருகையில் மீரா குறும்படம் போட்டா எல்லாம் தெரியும் என ஆண்டவருக்கு கட்டளை இடுவதை நிறைவேற்றுவாரா... கவின் காதல் பிரச்சினைக்கு தீர்வு சொல்வாரா... மோகனின் கட்டிக்கொடுவை கண்டிப்பாரா... சேரன் சொன்னது சரி என்பாரா... சாண்டியின் பார்வை சரி என்பாரா... லாஸ்லியா ஷெரின் பிரச்சினையில் யார் பக்கம் நியாயம் என்பாரா... என பல 'பாரா'க்களுக்கான விடைகளுக்காக காத்திருப்போம்...

பிக்பாஸ் தொடரும்.

பிக்பாஸ் பார்ப்பது தவறா..? என்ற எனது கட்டுரை ஹிக்ஸிக் தளத்தில் வெளியாகியிருக்கிறது. வாசிக்க நினைத்தால்...

-'பரிவை' சே.குமார்.

வியாழன், 18 ஜூலை, 2019



பிக்பாஸ் : சாக்லெட்டும் தண்ணீரும் கூடவே கடிகாரமும்

Image result for பிக்பாஸ் - 3 நாள் 23 படங்கள்

பிக்பாஸ் - கடந்த இரண்டு நாட்களாக மொக்கையும் மோகனின் முத்தமுமாகத்தான் கழிந்தது. வனிதா இல்லாத குறை நன்றாகத் தெரிய ஆரம்பித்திருக்கிறது. முன்னரே சொன்னது போல் நானே சின்னம்மா என மீரா களத்தில் இறங்கினாலும் களமாட முடியாமல் கண்ணீருடனே நிற்கிறது.

செவ்வாய்க்கிழமை ஓளிபரப்பப்பட்ட திங்கள்கிழமை நடந்து என்னவில்... என்னத்தை நடந்துச்சு... ஒண்ணுமே நடக்கலை என்றாலும் சின்னப்பிள்ளைத்தனமான பிரச்சினைகள்தான்... வாழைப்பழம், திரும்பத் திரும்பப் பேசுறே காமெடிகளின் பிக்பாஸ் வெர்சன் மற்றும் மோகனின் மோகனங்கள் மட்டுமே.

மோகனின் வயது காரணமாகக் கூட பாத்ரூம் கழுவ முடியவில்லை என்பதை ஏற்றுக் கொள்ளலாம்... ஆனாலும் அவரே எல்லாம் பார்த்துடுறாரு... நான் வாஷ்பேசந்தான் கழுவுறேன் இருந்தாலும் எனக்கு அந்தத் தண்ணி ஒத்துக்கலை... என்னை சமையல்ல போட்டுடுன்னு தலைவி சாக்சியிடம் சொன்னதில் அவருக்கு பாத்ரூம் கழுவுவதில் உடன்பாடில்லை என்பதாகவேபட்டது. தானே அந்த அணியின் தலைவர் என்கிற போது மற்றவர்களிடம் தன் நிலையை விளக்கியிருக்கலாம் அதைச் சாக்சியிடம் போய்ப் பேச வேண்டியதில்லை... சமையலா அங்க உங்க எதிரி சரவணன் இருக்காரு.... வச்சிச் செஞ்சிருவாரு.. என்று சாக்சி உண்மையைச் சொல்ல, அப்ப பாத்திரம் சுத்தம் பண்றேன்னு சொல்ல, அங்கயும் தண்ணிதானே இருக்குன்னு சாக்சி சொல்லவும்... விளக்கெண்ணெய் குடித்த வெள்ளாடு நிலமை ஆயிருச்சு அவருக்கு.

அப்புறம் சாக்சி பேச, சேரன் இதை எங்ககிட்டயே சொல்லியிருக்கலாமே என்றதும் நான் தலைவிக்கிட்டதான் சொன்னேன்னு குரலை உயர்த்தினார். ரேஷ்மா மற்றும் அபி அவர் முன்னரே பாத்திரம் கழுவ முடியலைன்னு சொன்னதை எடுத்து இயம்பியதும் சாக்சிதான் சொன்னா... நான் சமையல்தான் கேட்டேன்னு மாற்றினார்... அப்புறம் எப்பவும் போல் பொரணி டிஷ்கசன்... அதுல ஒரு பியூட்டி என்னன்னா சாக்சியோட குசுகுசுன்னு பேசிட்டு வெளிய வந்த மோகன், அங்க லாஸ்லியா நிக்கவும் என்ன செய்யுறதுன்னு தெரியாம 'நீ நல்லவள்'ன்னு ஏதோ பேச, நீ என்னத்தையோ பேசுய்யான்னு சிரிச்சிக்கிட்டே லாஸ்லியா போயாச்சு.

அதுக்கு அப்புறம் ரேஷ்மா, அபி, சாக்சி பேசுறாங்க... எல்லாருமே முதுகுக்குப் பின்னாலதான் பேசுறாங்க முகத்துக்கு நேரா பேசுறதில்லைன்னு சாக்சி... யாரு சாக்சி சொன்னாங்க மோகன் ஐயாக்கிட்ட... அப்ப ரேஷ்மாவும் நின்னாங்க... இவங்க யாருமே முதுகுக்குப் பின் பேசுபவர்கள் அல்ல... பொரணி மட்டுமே பேசுவார்கள் மறைவாய்ப் போய்... பேச்சு வார்த்தை முடிந்ததும் வலுக்கட்டாயமாக மூவருக்கும் முத்தம் கொடுத்து... போனஸாய் அவர்களிடமும் வாங்கி தன் அன்றைய கட்டிக்கொடு வைத்தியத்தில் வரவை வைத்துக் கொண்டார் மோகன். எனக்கு மகள்கள்தான் என்று சொல்லி கேமராக்கள் முன்னிலையில் அடிக்கடி கட்டியணைத்து முத்தம் கொடுக்கிறார்... நம்ம வீட்டுல பெத்த பிள்ளைக்கு முத்தம் கொடுத்தாக் கூட, ஆமா சின்னப் பப்பா... தூக்கி வச்சிக் கொஞ்சுறியளோன்னு திட்டுறானுங்க... ம்... என்ன உலகமய்யா இது.

அடுத்து நிகழ்ந்ததுதான் வாழைப்பழ காமெடி... சாக்லெட் விவகாரத்தில் கவினுக்கு இருமுனைத் தாக்குதல்... கவினைப் பொறுத்தவரை 'மச்ச்சான்' அப்படின்னு சொல்லிக்கிட்டே, தேங்காய்க்காக நிக்கலை தேங்காய் உடைக்கிற இடத்துல நிக்கிற பிள்ளைங்க மேல சில்லுப்பட்டு காயங்கீயம் ஆயிடக் கூடாதுன்னுதான் நிக்கிறேன்னு சொல்ற மாதிரி, தானே காதலைச் சொன்ன அபியை அத்துவிட்டுட்டு சாக்சி, லாஸ்லியான்னு இரட்டை மாட்டு வண்டியில ஜம்முன்னு போயிக்கிட்டு இருந்தான். சாக்சி லவ்வைச் சொல்ல, சரியின்னு அது பின்னால போனவனுக்கு இதுக்கிட்ட கிரிசுகெட்ட குணம் இருக்குன்னு தெரிஞ்சு ஷேப்பா ஒதுங்குறப்போ லாஸ்லியா மெல்ல உள்ள வர, இது நமக்குத் தோதாயிருக்கும்ன்னு அவனும் கொஞ்சமாய்ச் சாய, சாக்லெட் ரூபத்தில் வந்தது பிரச்சினை.

எல்லாருக்கும் சாக்லெட் கொடுத்த தலைவி சாக்சி, கவினுக்கும் ஒண்ணு கொடுத்துவிட்டு தன்னோட சாக்லெட்டையும் கொடுக்கிறார். லாஸ்லியாவுக்கு கவின் ஒரு சாக்லெட் கொடுக்கிறார். இந்த சாக்லெட் பரிமாற்றம் போட்டுக் கொடுப்போர் சங்கத்திற்குள் லாஸ்லியா மூலம் வர, நான் கொடுத்த சாக்லெட் எங்கே... அவகிட்ட கொடுத்தியான்னு சாக்சி கவினுக்கிட்ட கேட்க, மச்சான் நீ ஒரு சாக்லெட் எனக்குக் கொடுத்தே... அப்புறம் உன்னோட சாக்லெட்டையும் எனக்குக் கொடுத்தே... அப்ப எங்கிட்ட ரெண்டு சாக்லெட்டா... இப்ப நான் லாஸ்லியாக்கிட்ட நீ கொடுத்த சாக்லெட்டைக் கொடுத்தேன்... ஆனா நீ கொடுத்த சாக்லெட்டை நாந்தான் வச்சிருக்கேன்' அப்படின்னு ரெண்டு பழத்துல ஒண்ணு இந்தாருக்கு கதையா எதையோ சொல்ல சாக்சி என்னைத் தனியா விடு அப்படின்னு கவினை அடிக்காத குறையாச் சொல்லிட்டுப் போக, அங்கிட்டு லாஸ்லியா சேரனிடம் அழுதுக்கிட்டு இருந்துச்சு... என்னமோ சேரன் கம்பெடுத்து கவினை அடிக்கப் போற மாதிரி சின்னப் பிரச்சினைதான்... நீங்க அடிச்சிக்கிடுச்சுப் புடாதீங்கன்னு ரேஷ்மா ஏத்திவிட்டுச்சு. ஆனாலும் தந்தைப் பாசம் சேரனின் கண் கலங்கியதில் தெரிந்தது. சத்தியமாக மோகன் வைத்யாவின் பாசமாய் இல்லை. அணைப்பிலும் லாஸ்லியா நெஞ்சோடு சாய்ந்து கிடந்ததிலும் அப்பா மகள் உறவுதான் தெரிந்தது.

அப்புறம் பிக்பாஸ் பட்ஜெட் டாஸ்க்கை ஆரம்பித்தார். கடிகாரத்தோட அலாரத்தை இத்தனை நொடிக்குள் நிப்பாட்டிட்டா 700 மதிப்பெண்கள் என்றும் இதேபோல் நாலு முறை நடத்தப்படும், மொத்தம் 2800 மதிப்பெண்கள் என்றும் சொன்ன நொடிக்குள் நிப்பாட்டவில்லை என்றால் ஒவ்வொரு 10 நொடிக்கும் 100 மதிப்பெண் குறைக்கப்படும் என்றும் சொன்னார்.முதல் முறை சாண்டியும் மீராவும் அவர்களுக்கு உதவ சேரன் சென்றார். சொன்ன செகெண்ட்ஸ்க்குள்ள நிப்பாட்டல என்பதால் 600 மதிப்பெண்கள்... வெளியில் வந்த மீராவை கவின் ஜாலியாய்ச் சீண்ட, 'போர்ட்ராய்' எல்லாக் கிரிடிட்டுமே சாண்டிக்குத்தான் போகுது... நான்தான் எடுத்தேன்... அவன் பரிச்சிட்டான்... மக்கள் முன்னாடி நான் எப்பவுமே தப்பாத்தான் போர்ட்ராய் பண்ணப்படுறேன்னு கண்ணுல ஜலம் வச்சி டீச்சர் என்னைச் சும்மா சும்மா கிள்ளிட்டான்னு ஆரம்பிச்சி வச்சிச்சு... என்ன திரும்பத் திரும்ப பேசுறேன்னு வடிவேலு கணக்கா பேசிச்சா.... ஸ்ஸ்ஸ்... அப்பா அதை எழுதணும்ன்னா... சரி விடுங்க அடுத்த பதிவுல எழுதுவோம்.

லாஸ்வியாவும் 'அவ கூட கதை... உங்களுக்குள்ள பிரச்சினை இல்லைன்னா நான் உங்கூட கதைக்கிறேன்'னு சாக்லெட்டைத் திருப்பித் தர, கவின் பஞ்சரான புல்லட் மாதிரி ஆயிட்டான். சரி மேக்கப் போட்டிருக்கே... கலைஞ்சிரும் உள்ள போ அப்படின்னு எங்க சாக்சி பார்த்த மேலும் புயல் வலுவடைஞ்சிருமோன்னு விரட்டி விட்டான்.  அந்தப்புள்ள அவன் இதுக்குத்தான் விரட்டுனான்னு நல்லாவே தெரிஞ்சிக்கிட்டு சேரனிடமும் தர்ஷனிடமும் சொல்லியிருக்கு. அதை ரேஷ்மா கேட்டுட்டு சாக்சிக்கிட்ட சொல்லுச்சு. அது சேரன்கிட்ட போயி நின்னுச்சு... சேரனும் அவன் எதுக்குச் சொன்னான்னு தெரியாது... பட் நீ வர்ற மாதிரி இருக்கதாலதான் சொன்னாள்ன்னு சொல்றார். அவர் எதையும் மறைக்கலை... மறைக்க வேண்டிய அவசியமும் இல்லை.

என்ன  சாக்சி-கவின்-லாஸ்லியாவோட தில்லானா மோகனாம்பாள் கண்ணைக் கட்டுதுல்ல... அப்புடித்தான் எனக்கும் கட்டுச்சு... இதுக்கு இடையில டீச்சர் அடிச்சிட்டான் மீரா கதை வேற ரெண்டு நாளா ஓடுச்சு... சரி... சரி... கொஞ்சம் ரிலாக்ஸா சாக்லெட் மற்றும் மீரா கதையை அடுத்த பதிவுல பார்ப்போம்.

அதுக்கு முன்னாடி ஜாலியா கொஞ்சம்... சாக்லெட்டை திருப்பி வாங்கிட்டு சோகமா பாத்ரூம்ல போயி உட்கார்ந்தவங்கிட்ட சாண்டி என்னாச்சு... என்று கேட்க, விவரம் சொன்னதும் 'சரி விடு... அந்தச் சாக்லெட்டைக் கொடு... சாப்பிடலாம்' என்றதும் 'பேசிப் பாக்கிறேண்ணே... ஒத்துவரலைன்னா ஆளுக்குப் பிப்டி பிப்டி' சாப்பிடலாம்ண்ணே..' என்றான் கவின். ஆஹா... இதுதான் ஆண்கள்...

அதே மாதிரி மோகனை வழியனுப்ப சாண்டி பாட்டு வேற ரெடி பண்ணி வச்சிருக்கார். மோகனுக்குத் தெரியாது தெரிஞ்சா அம்புட்டுத்தான்... கண்ணுல ஜலம் வச்சிக்கிட்டு கேட்டியா சேதியவென கட்டிக்கொடு வைத்தியம் பண்ண ஆரம்பிச்சிருவாரு....

பிக்பாஸ் தொடரும்.
-'பரிவை' சே.குமார்.

புதன், 17 ஜூலை, 2019



சிறுகதை : அப்பத்தா (தேன்சிட்டு மின்னிதழ்)

ஜூலை-2019 தேன் சிட்டு மின்னிதழில் வெளியான சிறுகதை. பெரும்பாலும் அப்பத்தாக்கள் மீது பேரன் பேத்திகளுக்கு அதிகப் பற்றுதல் இருப்பதில்லை... அப்பத்தாக்களும் அப்படியே ஆயாக்களாக இருக்கவே விரும்புவார்கள். நான் அப்பத்தாக்களை மையப்படுத்தி, அவர்கள் மீதான் பேரன்பேத்திகளின் பாசத்தை கொஞ்சம் அதிகமாகவே வைத்துப் பல கதைகள் எழுதியிருக்கிறேன். அப்படியான கதைகளில் ஒன்றுதான் இது. 

ஊர்ல ஒரு கதை சொல்லுவாங்க... மகனோட பிள்ளையை நடக்கவிட்டுட்டு மகளோட பிள்ளையைத் தூக்கிட்டு வரப்புல நடந்து போனாளாம் ஒருத்தி, அப்ப வயல்ல பயிரை மாடு மேஞ்சிச்சாம்... இடுப்புல இருந்த பிள்ளை 'ஆயா உங்க வயல்ல மாடு மேயுது'ன்னு சொன்னுச்சாம். நடந்து வந்த பிள்ளையோ 'ஆத்தி... அப்பத்தா நம்ம வயல்ல மாடு மேயுது'ன்னு கத்திக்கிட்டே ஓடுச்சாம். எங்களுக்கெல்லாம் அப்பத்தாவின் அன்பு கிடைக்கலை 

அப்பத்தாவைப் பற்றி என்னும் போது நினைவுகளுடந்தான் பயணிக்க வேண்டும். நினைவுகளுடன் பயணிக்கும் கதைகளா... இதெல்லாம் நான் வாசிப்பதேயில்லை என்று சொல்வோர் மத்தியில் இதை வாசிக்கவும் ஒரு சாரர் இருக்கத்தான் செய்கிறார்கள். அவர்களின் உண்மையான கருத்துக்களே எப்போதும் என்னை வழி நடத்தும் என்று நம்புகிறேன். வாசித்துக் கருத்துச் சொல்லுங்க... என் தவறுகளைத் திருத்திக் கொள்ள வாய்ப்பாக இருக்கும்.

நன்றி 'தளிர்' சுரேஷ்.
*****************************************
அப்பத்தா

ப்பத்தாவுக்கு இப்ப வயசு தொன்னூறை நெருங்கிக்கிட்டு இருக்கு... அது நடபொடயாத் திரிஞ்சி வருசம் ரெண்டாச்சு. இப்பக் கண்ணும் தெரியல, காதும் கேக்கலை... இப்பல்லாம் பக்கத்துல போயி உக்காந்து அப்பத்தான்னு கத்திக் கூப்பிட்டாலும் கேக்குதில்ல.. மொதல்லாம் யாரு அதத் தொட்டாலும் எலும்பாகிப் போன கையால மெல்லத் தடவி எதையோ கண்டுக்கிட்ட மாதிரி சிரிச்சிக்கிட்டே அவங்க பேரச் சொல்லி நீதானேன்னு மெல்லக் கேட்டுட்டு நாந்தே கெடக்கேனே போயிச் சேராமன்னு அது சொல்லும் போது சுருக்கமான முகத்துல கண்ணீர் இறங்கி காதுப்பக்கமாப் போகும். இப்ப எதுவுமில்ல... உயிரிருக்கு அம்புட்டுத்தான்..

கொஞ்ச நாளாவே பீ, மூத்தரமெல்லாம் கட்டிலலதான்... காலயிலயும் சாயந்தரமும் தூக்கித் தொடச்சி படுக்கு வைக்கிறதும் அப்பப்ப தண்ணியாக் கரச்ச கஞ்சிய கீழ மேல சிந்தினாலும் குடிக்க வைக்கிறதும் அம்மாதான். அம்மாக்குத் தொணயா அப்பத்தாவ தூக்கிக் குளிப்பாட்ட ஓடியாரது எங்க சின்னத்த மவ செவ்வந்திதான்... அவ எனக்கு ரெண்டு வயசு இளையவதான்...  இந்த ரெண்டு வருசமா அம்மா முகஞ்சுழிக்காம பாக்குறதப் பாத்துட்டு பெரியநாயகி செஞ்சதுக்கு பாஞ்சாலி இப்புடி பாப்பான்னு நெனக்கவேயில்ல... அவளோட மனசு யாருக்கு வருமுன்னு ஊரே பேசுது.

கல்யாணத்துக்கு முன்னால திருச்சியில இருந்தேன்.. ஊருக்கு பதினைஞ்சி நாளைக்கி ஒருதரம் போயிருவேன்... இப்ப குடும்பத்தோட சென்னைப் பக்கம் வந்துட்டேன்... பொண்ணு பத்தாவதும் பையன் ஆறாவதும் படிக்கிறாங்க.. எம் மகளுக்கு கோயில்ல பேர் கூப்பிடும் போது பெரியநாயகின்னு அப்பத்தா பேரைத்தான் கூப்பிட்டாக. 

மனைவியும் வேலைக்குப் போறதால, வார விடுமுறைதான் குடும்பத்தோட கழிக்கிற நாளாகிப் போனதாலயும் சென்னையில் இருந்து ஊருக்கு வந்துட்டுப் போக ஒரு அமொண்ட் வேணுங்கிறதாலயும் இப்பல்லாம் விசேசத்துக்குத்தான் ஊருக்கே போக முடியுது. நெருங்கிய சொந்தம்ன்னா மட்டுமே சாவுக்கு பொயிட்டு ஓடியாருவேன். சென்னையில வீட்டு வாடகைக்கே தனியாச் சாம்பாதிக்கணும்... அதுபோக பசங்க படிப்பு.. அது இதுன்னு ரெண்டு பேரு சம்பளத்துலயே மாசக்கடைசியில துண்டு விழுக ஆரம்பிச்சிரும். அப்புறம் எங்கிட்டு அடிக்கடி ஊருக்கு ஓடுறது.

அம்மாக்கிட்ட பேசும் போதெல்லாம் அப்பத்தா எப்படியிருக்குன்னு கேட்பேன். ரெண்டு நாள் முன்னால பேசும் போதுகூட இப்புடிக் கெடயாக் கெடக்கதுக்கு போயித் தொலஞ்சா நிம்மதின்னு அப்பா கூட புலம்புறாருடான்னு சொன்னுச்சு... ஆமாம் அதோட வேதனைகளை வெளியில சொல்ல முடியாமக் கெடக்கு... ஒரே பக்கமா எப்படித்தான் நாளெல்லாம் கிடக்க முடியும்..? நரக வேதனையை அனுபவிச்சிக்கிட்டு இருக்கு.. அப்பா சொல்றதும் சரிதானே.. இப்படிக் கஷ்டப்படுறதுக்கு செத்துச்சின்னா அதுக்கும் நிம்மதி... இருக்கவுகளுக்கும் நிம்மதியில்லையா... நல்லா வாழ்ந்த மனுசி... பெரியநாயகின்னா ஊருக்குள்ள  இப்பவும் ஒரு பயமிருக்கு... அது நடபொடயாத் திரிஞ்ச வரைக்கும் யாரும் அதுக்கிட்ட சண்டைக்கு வரமாட்டாங்க... எதுக்கும் பயப்படாது... ஆம்பள மாதிரி இருந்த பொம்பள.  

பத்து வருசமா படுக்கையில கெடந்து உடம்பெல்லாம் புண்ணாகி, பக்கத்துல போகமுடியாத அளவுக்கு நாத்தமெடுத்துச் செத்தவங்கள நான் பாத்திருக்கேன். அப்பல்லாம் எதிரிக்கு கூட இப்படிப்பட்ட சாவு வரக்கூடாதுன்னு நினைச்சிப்பேன். 

செத்தா சூரங்குடியார் வீட்டு சுப்ரமணி மாமா மாதிரி சாவனும்... என்ன சாவுய்யா மனுசனுக்கு... குளிச்சிட்டு வீட்டுக்கு வந்து சாமி கும்பிட்டு நெத்தி நெறய தூணூறைப் பூசி, கமலத்த கஞ்சி ஊத்த, ரெண்டு தட்டு குடிச்சிட்டு, கை கழுவி வாயக்கொப்புளிச்சி வாசலுக்கு வந்து துப்பிட்டு, எரள்ளிக்கிட்டு இருந்த அவரு தம்பி செல்வராஜூ பொண்டாட்டிக்கிட்ட, என்னடி நெடுங்கொளத்தா சாணிக்கி வலிக்கிங்கிற மாதிரி மெல்ல அள்ளுறே... வேகமா அள்ளுடி... நெத்தியில வேர்த்திருக்கு தொடச்சி விட வரவா... நா நல்லாத் தொடப்பேன்டின்னு கிண்டல் பண்ணிட்டு கட்டில்ல வந்து உக்காந்து கமலத்த கொடுத்த காபியக் குடிச்சிக்கிட்டு இருந்தவரு நெஞ்சைப் பெணையிறது மாதிரி இருக்கு கமலம்ன்னு சொல்லியிருக்காரு... அது என்ன ஏதுன்னு பாக்குறதுக்குள்ள எல்லாம் முடிஞ்சிருச்சி.. 

அந்த மாதிரி சாவு எல்லாருகும் வராது. அதுக்கெல்லாம் கொடுப்பின வேணும் போல. அந்தக் கொடுப்பின எனக்கு இருக்கான்னு கூடதெரியல ஆனா என்னைச் சேர்ந்த எல்லாருக்கும் அந்தக் கொடுப்பினையைக் கொடுன்னு முருகனுக்கிட்ட அடிக்கடி வேண்டிக்குவேன். எங்கண்ணு முன்னால உறவுகள் எல்லாம் கஷ்டப்பட்டு சாவுறத பாக்குற சக்தி எனக்கில்லை.

அம்மா கல்யாணமாகி அந்த வீட்டுக்கு மூத்த மருமகளா வந்து பட்டபாடு கொஞ்ச நஞ்சமில்லையாம். காலையில சூடாச் சோறு சாப்பிட்டா ஏம் மசுத்துக்கு கஞ்சி எறங்காதோ... மகாராசா வீட்டுல இருந்து வந்துட்டிய... தட்டுக்கெட்டவன் வீட்டுல பொறந்துட்டு தர்ம மவராசா மகளாட்டம் சுடு சோறு சாப்பிடுறாக சுடு சோறுன்னு அப்பத்தா திட்டுமாம். 

தொடர்ந்து ரெண்டு பொம்பளப்பிள்ள பொறந்த பின்னால நா அம்மா வயித்திலிருந்தப்போ, இதுவாச்சும் ஆம்பளபுள்ளயாப் பொறக்கட்டும்ன்னு யாராச்சும் அப்பத்தாக்கிட்டச் சொன்னா, அம்மா காதுல விழுகுற மாதிரி ஆமா மசுருல பொறக்கும்... இதுவும் பொட்டையாத்தான் பொறக்கும்ன்னு சொல்லுமாம். ஐயா கூட எதுக்கு அந்தப்புள்ளய கரிச்சிக் கொட்டிக்கிட்டு இருக்கேன்னு சத்தம்  போடுவாராம்... 

சித்தப்பாக்களுக்கு கல்யாணமாகுற வரைக்கும் அம்மாதான் அப்பத்தாவோட கிரிக்கெட் மைதானம்... எல்லாப் பந்தையும் அம்மா மேல டைரக்டா இறக்குமாம். அம்மாவோட தலமுடியப் பிடிச்சி இழுத்துப் போட்டெல்லாம் அடிக்குமாம்... அம்மா நிறையத் தடவை அதோட கதயச் சொல்லியிருக்கு.. அப்பல்லாம் அம்மாவோட கண்ணு கலங்க, நாங்களும் அம்மாவுக்காக அழுதிருக்கோம்.

அப்பா செட்டிய வீட்டுக் கணக்குப் பிள்ளங்கிறதால காலையில பொயிட்டு ராத்திரி ஏழெட்டு மணிக்குத்தான் வருவாராம்... அப்ப குடியும் இருந்திச்சாம்... அப்பத்தா அடிச்சிச்சு,  திட்டுச்சுன்னு அம்மா சொன்னா, ஆதரவாக்கூட எதுவும் பேசமாட்டாராம். ஆனா அம்மா இப்புடிப் பேசுச்சு... அப்புடிப் பேசுச்சின்னு அப்பத்தா சொன்னாப் போதுமாம்... உடனே என்ன ஏதுன்னு கூட கேக்காம இழுத்துப் போட்டு அடிப்பாராம். 

அம்மா திடீர் திடீர்ன்னு கோவிச்சிக்கிட்டு ஆயா வீட்டுக்குப் போயிடுமாம்... ஐயாதான் சமாதானம் பண்ணி கூட்டியாந்து விடுவாராம். அப்பாக்கிட்ட சடங்கான பின்னால எம்மவள நாங்கூட அடிச்சதில்ல... உங்காத்தா அடிக்கிறதெல்லாம் நல்லாயில்லப்பான்னு  பல தடவ சொல்லியும் அவரு திருந்தலையாம்... மாமால்லாம் அம்மாவக் கொடுமப் படுத்துற அப்பாவ அடிக்கக்கூட போனாங்களாம்.  ஐயாதான் வீட்டுக்கு வந்த மாப்ளய அடிக்கிறது அழகில்லைன்னு திட்டுனாராம்.

ரெண்டு சித்தப்பா தனியாப் பொயிட்டாலும் நாங்க அந்த வீட்டுலதான் இருந்தோம்... கடைசித் தங்கச்சி பொறந்ததுக்குப் பின்னாடித்தான் ரோட்டோரமாக் கிடந்த பனஞ்செய்யில சின்னதா ஒரு வீட்டைக் கட்டி தனிக்குடித்தனம் வந்தோம். அதுக்கும் அம்புட்டுப் பிரச்சனை... அப்பத்தா நல்லாவே இருக்க மாட்டேடான்னு மாரியாத்தா கோவில் முன்னால மண்ணள்ளித் தூத்துச்சு.  

தனியா வந்த பின்னாலதான் அப்பாக்கு பொறுப்பே வந்திச்சி... தண்ணிய விட்டாரு... சின்னதா ஒரு கட வச்சாரு. அப்பா கொடுமக்காரராத் தெரிஞ்சதாலயோ என்னவோ நாங்கள்லாம் அப்பாக்கிட்ட அதிகமாப் பேசுறதில்ல... எதாயிருந்தாலும் அம்மாக்கிட்டதான் சொல்வோம். அப்பா வீட்டுக்குள்ள வந்துட்டா நாங்க வெளிய எந்திரிச்சிப் போயிடுவோம். இப்பவும் அதிகம் பேசுறதில்ல... கேக்குற கேள்விக்கு அவரும் பதில் சொல்வார்... நாங்களும் பதில் சொல்வோம்.

நாங்கள்லாம் பழைய வீட்டுல இருந்தப்போ அப்பத்தா அம்மாக்கிட்ட சண்ட போட்டாலும் எங்ககிட்ட நல்லாத்தான் நடந்துக்கும். அப்பத்தா நிறைய எரும மாடுக வச்சிருந்துச்சு... அது ஒவ்வொன்னுக்கும் ஒரு பேரு வச்சிருக்கும். அதச் சொல்லிக் கூப்பிட்டா திரும்பிப் பார்த்து கத்துங்க... காலையிலயும் சாயந்தரமும் பால் பீச்சி... இரவு அதைப் பக்குவமாக் காய்ச்சி உறை ஊற்றி வைக்கும். காலையில எந்திரிச்சவுடனே தயிர மத்தால் கடையும்... அதுக்கு முன்னால வீட்டுக்குத் தனியா... சிதம்பரம் செட்டியாருக்குத் தனியா கெட்டித்தயிர் எடுத்து வைக்கும். 

என்ன செட்டியாருக்கு மட்டும் கெட்டித் தயிருன்னு யாராச்சும் கேட்டா... அவருக்கு எருமத்தயிர சோத்துல கெட்டியாப் போட்டு பெசஞ்சி சாப்பிடத்தான் பிடிக்குமாம்ன்னு சொல்லுறதோட, இதுக்கு காசு கொஞ்சம் அதிகமாவே கொடுக்கும் செவாமி ஆச்சி... அதுபோக நல்லதபில்லத அள்ளிக் கொடுத்து விடுதுல்லன்னு சொல்லிச் சிரிக்கும். 

தயிரக் கடஞ்சி.... வெண்ணயெடுத்து ஒரு டப்பால கொஞ்சம் தண்ணி வச்சி அதுல உருண்டை உருண்டையா உருட்டிப் போட்டு வைக்கும். யாராச்சும் நெய் கேட்டா எடுத்து அதுக்குன்னே வச்சிருக்கிற சின்ன இருப்புச் சட்டியில வேணுங்கிற உருண்டய எடுத்துப் போட்டு சீரகமும், கருவப்பில்லையும் போட்டுக் காச்சி கொண்டு போய்க் கொடுக்கும். நெய் காச்சுன இருப்புச் சட்டியில சோத்தப் போட்டு பெசஞ்சி எங்களுக்கு கொடுக்கும். அந்தச் சுவை இன்னக்கி கடயில வாங்குற நெய்யில இல்ல.

காலையில எங்கூருல இருந்து நிறையப் பேர் தயிர் விக்கப் போவாங்க... ஆனா அப்பத்தா அவங்க கூடல்லாம் சேந்து போகாது.. எட்டுமணிக்கு மேல தயிர்ப்பானை, ஒலக்கு, குண்டுக்கரண்டி. தொடக்கிற துணி, சிதம்பர்ம் செட்டியாருக்கு எடுத்து வச்ச கெட்டித்தயிருன்னு எல்லாத்தையும் ஒரு சின்ன ஓலப்பொட்டிக்குள்ள வச்சி, சீல முந்தானையில சுருமாடு சுத்தி தலயில வாக வச்சி சரிபாத்து பேட்டாச் செருப்பு டப்புட்டப்புன்னு அடிக்க நடந்து போகும். தயிருப்பெட்டிய தூக்கி வச்சிட்டா கையால புடிக்கவே புடிக்காது. தயிரூத்திட்டு திரும்பும் போது ரெண்டு மணியாயிரும்..

அப்பத்தா ஒருநா கூட முடியலன்னு படுத்ததில்லை. இருந்தாலும் ஒருவேளை முடியாம வந்திட்டா முடியாதன்னக்கி அம்மாதான் போவணுமின்னு வீடுகளயெல்லாம் கூட்டிக் கொண்டு போய் காட்டி வைக்கும். அம்மா தயிரூத்தப் பொயிட்டு வந்தா கேள்வி மேல கேள்வி கேட்டுக் கொன்னு எடுத்துடும். 

தயிரூத்திட்டு வரும்போது எங்களுக்கு கடலமிட்டாய், கலுக்கோனால்லாம் வாங்கிட்டு வரும் , லீவு நாள்ன்னா அதிரசமும் முறுக்கும் வாங்கிக்கிட்டு வரும். நாந்தான் பெரும்பாலும் மாடு மேய்க்கப்போவேன்.. அதுக்கு செவ்வந்தியும் ஒரு காரணம்... வரும்போதே ரோட்டுல நின்னு ஏ பாசுன்னு கத்திக் கூப்பிட்டு எனக்கும் செவ்வந்திக்கும் திங்கிறதுக்கு எடுத்துக் கொடுத்துட்டுப் போகும். அப்பல்லாம் என்ன வெயிலுன்னு சொல்லிக்கிட்டு முந்தானயால மொகந்தொடச்சிக்கிட்டு கொஞ்சம் தயிரு கெடக்கு குடிங்கன்னு சொல்லி ஒலக்குல ஊத்திக் கொடுக்கும். நானும் செவ்வந்தியும் பாதிப்பாதி குடிச்சிப்போம். 

தனியா வந்தப்புறமும் எதாச்சும் வாங்கிட்டு வந்து வீட்டு வாசல்ல நின்னு அடியேய்... டேய் பயலுகளான்னு கத்தி கொடுத்துட்டுப் போகும். வீட்டுக்குள்ள வராது... அப்பா வீட்ல இருந்தா மண்ணள்ளித் தூத்துச்சு அதுக்கிட்ட வாங்கித் தின்னுங்கன்னு சத்தம் போடுவாரு. அம்மா எதுவும் சொல்லாது. எங்க மேல அம்புட்டுப் பாசம் வச்சிருக்கிற மனுசிக்கு அம்மா மேல மட்டும் பாசமில்லாமப் போச்சேன்னு தோணும்... அப்பல்லாம் பாவம் அம்மான்னு நினைப்பு வரும்... இப்ப கெடையாக் கெடக்க அப்பத்தா பாவம்ன்னு தோணுது.

ஐயா இருக்க வரைக்கும் ராசாத்தியா இருந்த அப்பத்தா, அவரு போனதுக்குப் பின்னால ரொம்ப சிரமப்பட்டுச்சு. பழைய வீடு சின்ன சித்தப்பாவுக்கு கொடுத்துட்டு எல்லாரும் தனியாப் பொயிட்டாங்க... ஐயா கண்ணோட சொத்தெல்லாம் பிரிச்சிக் கொடுத்துட்டாரு... ஐயா இருக்கும் போதே  சின்னச் சித்திக்கும் அப்பத்தாவுக்கும் சரியா வரல... 

அவரு போன பின்னாடி ஒரு தடவ சித்தி அப்பத்தாவை அடிச்சிருச்சின்னு தெரிஞ்சி அம்மா வருத்தப்பட்டப்ப, அன்னைக்கி ஒன்னைய அடிச்சிச்சில்ல... வாங்கட்டும்ன்னு அப்பா சொல்ல, ஆமா அன்னைக்கி நாம ஆத்தா பேச்சுத்தானே கேட்டோம்... ஏ எம்பொண்டாட்டிய அடிக்கிறேன்னு ஒருவாத்த கேட்டிருப்பியலா... பத்தாததுக்கு நீங்களுந்தான் தூக்கிப்போட்டு மிதிச்சிய... என்னய அடிச்சிருந்தாலும் ஒரு பெரிய மனுசிய அடிக்கிறது தப்பில்லையா...  நாமதான் அத்துப்பொயிட்டோம் சின்னவுகளுக்கு... ரெண்டு பேருக்கும் சரிவரலைன்னா ஒங்க தம்பிககிட்ட சொல்லி அங்கிட்டு வச்சிக்கச் சொல்லியிருக்கலாமுல்ல... இன்னக்கி இவ அடிச்சா நாளக்கி அவபுள்ள அவள அடிப்பான்... அம்புட்டுத்தான்... முன்னத்தி ஏரு  போற பாததானே பின்னத்தி ஏரு போவும் அப்படின்னு அம்மா சொன்னப்பத்தான் அம்மாவோட மனசு எங்களுக்குப் புரிஞ்சது. ஒங்கொணம் எல்லாருக்கும் வராதுடின்னு அப்பா ஜாகா வாங்கிட்டார்.

சின்ன சித்தப்பா வீட்டுல சரிவராம மத்த சித்தப்பாக்க வீடுகளுக்கும் போயி எல்லா இடத்திலயும் விருந்தும் மருந்தும் மூணு நாளுக் கணக்கா பிரச்சினை வர, ஊருக்குள்ள இருந்த சின்னத்த வீட்ல.. அதான் செவ்வந்தி வீட்ல கூட்டிக் கொண்டு போயி வச்சிருந்தாக... 

ஐயா இருக்க வரைக்கும் ஓரளவு பேச்சு வார்த்தையில இருந்த சித்தப்பாக்களோட இப்ப சுத்தமாவே அத்துப் போச்சு... மொறப்பாடு கட்டிக்கிற அளவுக்கு என்ன பகையின்னு  தெரியல... 

அப்பத்தாவ சித்தாப்பாக்கள் பாக்காதபோது அப்பாக்கிட்ட வெள்ளச்சாமியய்யா அது எதுக்குப்பா வீடு வீடா திரியணும்... மூத்தவன் நீ கூட்டியாந்து வச்சிக்கன்னு சொன்னதுக்கு, செஞ்சதை அனுபவிக்குது சித்தப்பா அனுபவிக்கட்டும்ன்னு சொல்லிட்டு வந்திருக்கார். அப்பத்தாவுக்கும் எங்க வீட்டுக்கு வர்றதுக்கு யோசனை... அவள என்ன பாடு படுத்தினோம் அவகிட்டயா போயி நிக்கனுமின்னு நெனச்சிருக்கும் போல... 

அப்பத்தாவப் பாக்க பெரியத்த வந்தப்போ இங்கன இவனுகளப் பாத்துக்கிட்டு சின்னவ வீட்ல இருக்க கஷ்டமாயிருக்குத்தா உன்னோட வந்திடுறேன்னு சொல்லி அழுதிருக்கு. அத்த எங்க வீட்டுக்கு வந்தப்ப ராணி மாதிரி இருந்த பொம்பள... பெரிய நாயகின்னா ஊரே பயப்பட்டுச்சி... எம்புட்டு கோவக்காரியா இருந்தாலும் பள்ளுப்பறையின்னு அத்தன சனத்துக்கும் சோறு போட்டுச்சு... அது பண்ணுன ஒரே தப்பு அத்தாச்சிய கொடுமப்படுத்துனதுதான்... யாரு சொல்லியும் கேக்கல மனுசி... இந்தா பாசு பொறக்கு முன்னால ரொம்பக் கேவலமாப் பேசுச்சு... இன்னக்கி அதான் ஓம்மூட்டுக்கு வரமுடியாம வீடுவீடா அலையிது.. எங்கூட காட்டூரணிக்கி வாறேன்னு நிக்கிது என்றபோது அப்பா எதுவும் பேசலை.

என்னத்தாச்சி சொல்லுறிய... காட்டூரணிக்கா... நல்லாருக்கு கத... ஆறு ஆம்பளப்புள்ளய பெத்துப்புட்டு... இப்ப ஆரு கொரச்சலா இருக்கா... இங்கருக்கவுக கொறச்சலா இல்ல ஊருப்பக்கமிருக்க மத்த ரெண்டு பேருங் கொறச்சலா... சொல்லுங்க... ஆறு பேரு இருந்துக்கிட்டு அயித்தய நீங்க கூட்டிக்கிட்டுப் போனா நல்லாவாயிருக்கும். பாக்குறவுக என்ன சொல்லுவாக... பெத்தவளுக்கு கஞ்சி ஊத்த வக்கத்த பயலுகன்னு சொல்லமாட்டாவளா... பேசாமா இங்க கொண்டாந்து விட்டுட்டுப் போங்க... நாம்பாத்துக்கிறேன்னு அம்மா சொன்னதும் அத்த யோசனையோடுதான் பாத்துச்சு... 

அட என்ன யோசிக்கிறிய... அவுக பண்ணுன கொடுமையவா... அத விடுங்க... அவுக திட்டுனதாலயும் அடிச்சதாலயும் கெட்டா பொயிட்டோம்... ஆத்தா பேச்சக் கேட்டுக்கிட்டு இந்தா இருக்காவளே இவுக அடிக்காத அடியா மிதிக்காத மிதியா... எல்லாத்தையும் வாங்கிட்டு ஆறு புள்ள பெத்துக்கலயா... இல்ல இவுக கூட வாழாம இருந்தேனா... இப்ப வரைக்கும் வாந்துக்கிட்டுத்தானே இருக்கோம். அவுக திட்டினதாலயும் அடிச்சதாலயும் நாங்க கெட்டுப் போயிடல.. நா வந்து கூப்புடல... இப்பல்லாம் சின்னவளுஞ் செரியாப் பேசுறதில்ல... அவுக சண்டயில நாங்க குளிர்காயுறமுன்னு சொல்லுவாக... கூட்டியாந்து விட்டுட்டுப் போங்க... என்று அம்மா அத்தக்கிட்ட சொல்ல அந்த வெள்ளிக்கிழமை அப்பத்தா எங்க வீட்டுக்கு வந்துச்சி.

நாளாக நாளாக அம்மாவோட கொணத்தைப் பாத்து அப்பத்தா மவராசி ஒங்கிட்ட அப்புடி நடந்துக்கிட்டேனே... அப்பவும் அந்தாளு அந்தப்புள்ளய திட்டாத அந்தப்புள்ளய திட்டாதன்னு கத்துவாரு கேட்டேனே... சாகுறதுக்கு முன்னாலகூட ஒனக்கு முன்னால நாம்போயிச் சேந்திருவேன். அதுதான் ஒனக்கு கஞ்சி ஊத்தும் வீம்பு பாக்காம மூத்தவமூட்டுக்குப் போன்னு சொன்னாரு... கேட்டேனா... நாத்துனா மவன்னு கட்டிக்கிட்டு வந்தவதான் தூக்கிப் போட்டு மிதிச்சா... நாஞ்செஞ்ச பாவம்ன்னு புலம்பும். அப்பல்லாம் அம்மா சிரிச்சிக்கிட்டே பழசெல்லாம் எதுக்கத்தேன்னு சொல்லும். 

நாங்க அம்மாக்கிட்ட ஒனக்கு அப்பத்தாமேல கோபமேயில்லயாம்மான்னு கேட்டா, சிரிச்சிக்கிட்டே எதுக்கு கோபப்படணும்... அவுக மாமியா கொடுமப்படுத்தியிருப்பாக... அந்த வைராக்கியத்த எங்கிட்ட காட்டுனாக... ஒங்க சித்தப்பம் பொண்டாட்டிககிட்ட அப்புடியா நடந்துக்கிட்டாக... இல்லையே... நா அவுகளப் பாத்தா நாளக்கி உங்க பொண்டாட்டிக என்னைய நல்லாப் பாத்துப்பாளுகதானே... எல்லாம் சுயநலந்தான்னு சிரிக்கும்.. 

அம்மா சொல்றது உண்மதானே... நாம என்ன செய்யிறமோ அதுதானே நமக்கு திருப்பிக் கெடைக்கும்.  நாங்க அங்கிட்டு அங்கிட்டு இருந்தாலும் ஊருக்குப் போயி ஒண்ணா பண்டிகைகளையும் திருவிழாக்களையும் கொண்டாடும் போது எங்க மனைவிங்க எல்லாம் அம்மாவை அம்மா அம்மான்னு கூப்பிட்டுக்கிட்டு மகிழ்ச்சியா இருப்பதை பாக்குறதே ஒரு சந்தோஷந்தான்.

அப்பத்தா வந்த பின்னால சின்னத்த மறுபடியும் நல்லாப் பேசி வீட்டுக்கு வர ஆரம்பிச்சிச்சி... அதுக்கு செவ்வந்திய எனக்குக் கட்ட ஆசை... ஆனா அப்பா அதெல்லாம் சரிவாராதுன்னு சொல்லிட்டாரு. செவ்வந்திக்கும் ஆச இருந்துச்சின்னு எங்கல்யாணத்துக்கு அப்புறந்தான் தெரியும்... இப்ப மூத்த சித்தப்பா பையனுக்குத்தான்   வாக்கப்பட்டிருக்கா... 

அப்பத்தா நடபொடயிலாம விழுந்ததுக்குப் பின்னால ரெண்டு சித்தப்பாவும் பெரியத்தக்கிட்டச் சொல்லி சேந்துக்கிட்டாக... வெளியூருல இருக்க சித்தப்பாக்க ஊருப்பக்கம் அதிகம் வாரதில்லை... எப்பவாச்சும் போனுல விசாரிக்கிறதோட சரி. எவ்வளவோ பேரு சிபாரிசு பண்ணியும் சின்னச் சித்தப்பாவோட மட்டும் அப்பா சேரமாட்டேன்னு பிடிவாதமா நின்னாரு... 

நாலு மாசத்துக்கு முன்னால திருவிழாவுக்கு ஊருக்குப் போனப்போ வெள்ளச்சாமியய்யா மறுபடியுமா அண்ணந் தம்பியாவாப் பொறக்கப் போறானுக... உங்கப்பனுக்கிட்ட சொன்னா கேக்க மாட்டேங்கிறான்... நீங்கள்லாம் பேரம் பேத்தி எடுக்குற வயசாச்சுல்ல... எடுத்துச் சொல்லி ஒண்ணாச் சேந்துக்கப் பாருங்க பேராண்டின்னு சொன்னாரு. அப்புறம் ஒரு வழியா நாங்கள்லாம் சேந்து அம்மாவ முன்னிருத்தி அப்பாவ சம்மதிக்க வச்சி சேத்து வச்சோம்... 

முன்ன மாதிரி குடும்பங்களுக்குள்ள ஒரு ஒட்டுதல் இல்லாட்டியும் வா போன்னு சொல்றளவுக்கு இருக்கு. என்னத்த சாதிச்சிப்புட்டோம்.. அத்துக்கிட்டு நின்னு எதக் கொண்டு போப்போறோம்ன்னுதான் எனக்குத் தோணும்... ஒரு மாருல பால் குடிச்சிட்டு இன்னக்கி மொறப்பாடு... அவனோட வீட்டுல தண்ணிகூட குடிக்க மாட்டேன்னு இருக்கவுகள பாத்தா கடுப்புத்தான் வரும்...

காலயில அம்மாட்டப் பேசினப்ப நேத்துலயிருந்து கரகஞ்சியும் போகலப்பா... நா, செவ்வந்தி, ஒங்க சித்தியன்னு எல்லாருந்தான் மாத்தி மாத்தி பாக்குறோம்... நேத்துலயிருந்து நெனவு தப்பிருச்சி... இன்னம் ரெண்டு நாள்ல ஆடி அம்மாவாச... அதுல அடிச்சிரும்ன்னு வையாபுரி அண்ண வந்து பாத்துட்டு சொல்லிட்டுப் போனாரு... இப்படிக் கெடக்கதுக்கு போகட்டும்ன்னுதான் எல்லாருக்கும் தோணுதுப்பா.. 

உங்க அப்பத்தாவோட ஆச அது வாந்த வூட்டுல இருந்து கட்டத்தலக்கிப் போனுமின்னு... இப்பத் தூக்கவேணான்னு பெரியவுகள்லாம் சொல்றாக. செத்தா நம்ம பழய வீட்டுலதான் கொண்டேயி போட்டு வக்கணும்... ஓடம்பெல்லாம் பிச்சிக்கும் போல இருக்கு... வவுரு வேற ஊதுனாப்பில இருக்கு...  எப்படி அங்க கொண்டு போறதுன்னு தெரியல... அந்த மனிசி போடாத ஆட்டமா... ம்... எல்லாம் முடிஞ்சிருச்சி... இப்ப எப்ப சாவுமின்னு ஊரே காத்துக்கிட்டு கெடக்கு.... என்றபோது அம்மாவின் குரல் கம்மியதை உணர்ந்தேன். 

கண்டாங்கிச் சீலையை வரிஞ்சி கட்டிக்கிட்டு அப்பத்தா வயல்ல வேல பாக்குறது எங்கண்ணுக்குள்ள வந்து போக, எங்கப்பத்தா பத்து ஆம்பளக்குச் சமம்ன்னு ஊரில சொல்லுவாக... அப்படிப்பட்ட மனுஷியோட நிலமையை நினைச்சப்போ கன்னத்தில் கண்ணீர் இறங்கியது.

எப்படியும் உயிரோடு ஒருமுறை பார்த்திடலாம் என்ற நம்பிக்கையோடு பயணப்பட்டேன்.... அப்பத்தாவின் நினைவுகளைச் சுமந்து....
-‘பரிவை’ சே.குமார்

செவ்வாய், 16 ஜூலை, 2019



பிக்பாஸ் : வனிதா இடத்தில் மீரா..?

Image result for bigg boss season 3 episode 15 images
(அபிராமி - முகன்)
பிக்பாஸ் வீட்டிலிருந்து வனிதா வெளியேற்றப்பட்டதை அறிவீர்கள்... வனிதா போனதால் பிக்பாஸ் டிஆர்பிக்கு அடி விழும் என்பதை அறிந்தும் மோகனோ மீராவோ போக வேண்டிய இடத்தில் வனிதா ஏன் வெளியேற்றப்பட்டார் என்ற கேள்வி எல்லாருக்கும் எழுந்திருக்கும். 

பனிரெண்டு கோடிக்கும் மேல் வாக்குகள் கிடைத்திருக்கின்றன என்ற கமலின் கணக்கில் வனிதாவுக்கு வாக்குக் கிடைக்கவில்லை என்பதற்கு காரணம் அவரின் செயல்பாடுகள்தான் என்றாலும் மக்கள் வாக்கின் அடிப்படையில் ஆட்களை வெளியேற்றுகிறோம் என்று சொல்லிக் கொண்டே பிக்பாஸ் எப்போதும் எடுக்கும் தன்னிச்சையான முடிவுகள் ஏன் வனிதாவுக்காக எடுக்கப்படவில்லை..? ஏன் மோகன் காப்பாற்றப்பட வேண்டும்...? ஏன் மீரா காப்பாற்றப்பட வேண்டும்..? 

தன் பெயர்தான் வந்தது என்றாலும் சீக்ரெட் ரூமுக்கா இருக்கும்... நல்லாத்தானே விளையாண்டேன்.... நம்ப முடியவில்லை... மனதில்பட்டதைப் பேசுவது தப்பா.. என்ற குரல்கள் சொல்வதன் பொருள் என்ன..? வனிதா தொடர்வார் என்ற நினைப்பு எல்லாருக்குள்ளும் இருந்திருக்கு என்பதுதானே அது.

வனிதாவின் குடும்பப் பிரச்சினைகளுக்காக அவர் நீதிமன்றம், காவல் நிலையம் எனச் செல்வதற்கு வெளியில் இருக்க வேண்டியதன் அவசியம் உணர்ந்தே அவர் வெளியேற்றப்பட்டார் என்ற செய்திகள் உலா வருகின்றன. அதுதான் உண்மை என்றும் தோன்றுகிறது.  

நான் மனதில்பட்டதைச் சொல்லத் தயங்குவதில்லை அதுவே என்னோட சிறந்த குணம் என மார்தட்டிக் கொள்ளும் வனிதா, மற்றவர் பிரச்சினையில் நுழைந்து அதைப் பெரிதாக்கி அவர்கள் சண்டையில் மகிழ்ந்து கிடக்கும் குணத்தை ஏன் தனது சிறந்த குணத்தில் ஒன்றாய்ச் சொல்லவில்லை என்று தோன்றினாலும் ஒரு பெண்ணாய் போராடிக் கொண்டிருக்கும் பல தாய்மார்களில் அவரும் ஒருவர்... எந்தப் பிரச்சினைக்கும் மரணம் தீர்வாகாது... அதுவும் உங்களை நீங்களே அழித்துக் கொள்ளும தற்கொலை முயற்சியில் மட்டும் இறங்காதீர்கள்... அது உங்கள் மரணத்துக்குப் பின் உங்களை நம்பி இருந்தவர்களை வாழ்நாள் முழுவதும் கொன்று கொண்டே இருக்கும் என்று அவர் சொல்லிச் சென்றது மிகச் சிறப்பானது... உண்மையானது. பல நேரங்களில் பிரச்சினை சூழ் வாழ்வில் இப்படியான எண்ணங்கள் தோன்றும் போதெல்லாம் நமக்குப் பின் மனைவிக்கு, குழந்தைகளுக்கு யார் இருப்பார்கள்..? என்ற எண்ணம் முன் நின்று எதிர்மறை எண்ணத்தைப் பின்னுக்குத் தள்ளிக் கொண்டேதான் இருக்கிறது.

வனிதாவின் வெளியேற்றத்துக்குப் பின் பிக்பாஸ் இல்லம் ஜெயலலிதா இல்லாத அ.தி.மு.க போல்தான் இருக்கும் என்பதைக் கமல் உள்பட எல்லாருமே அறிந்துதான் வைத்திருக்கிறார்கள். அம்மா இடத்தில் சின்னம்மா போல மீராவுக்கு கொம்பு சீவப்படுகிறது. மீரா அந்தளவுக்கு எல்லாம் இல்லை என்பதை கவின், 'வனிதாக்கா கடைசி வரை நின்னு பேசும்... நீ பாதியிலே ஒடிருவே...' என ஒற்றை வரியில் சொல்லிவிட்டான். சின்னம்மா நிலைதான் மீராவுக்கும்... நான் அடிச்சி ஆடுறேன் பாரு... வாயைத் தொறந்த கெட்ட வார்த்தையைக் கொட்டுவேன் தெரியுமா..? என்றெல்லாம் மீரா பில்டப் விட்டு வச்சிருக்கு என்றாலும், எழுபதுகளின் நாயகிகளைப் போல் எல்லாத்துக்கும் அழுது ஆர்ப்பாட்டம் பண்ணுவதுடன் பக்கம் பக்கமா வசனம் வேற பேசி எரிச்சலைத்தான் ஏற்படுத்துகிறது. பிக்பாஸ் மீராவுக்கு மணிரத்னம் பட நாயகிகளுக்கு மாதிரி சின்னச் சின்ன வசனங்கள் கொடுங்க போதும்... நீண்ட பேச்சு எரிச்சலா இருக்கு... மீரா நின்னு பிடிக்குமா தெரியாது ஆனா பிக்பாஸ் வீட்டிலிருக்கும் எரிச்சலை ஏற்படுத்தும் பெண்ணாக எல்லார் மனதிலும் நிற்கும்.

வனிதா வெளியேறும் போது உண்மையா இருந்தா வெளியேற்றுவாங்களா என்று கேட்கும் சாக்சி எப்போதுமே உண்மையாக இருக்கவில்லை என்பதை உணராதது ஏனோ..? எல்லாமே அறிந்தது போல் பேசும் சாக்சி, மீரா விஷயத்தில் மட்டும் கூமுட்டையாக இருப்பது ஏன்..? ஷெரின் கூட கொஞ்சம் மாறி எல்லாரிடமும் கலந்து பேச ஆரம்பித்திருக்கிறார். 

சாக்சியைப் பொறுத்தவரை மீரா வெளியேறுவார் என்றே நம்மைப் போல் நம்பியிருக்கிறார். கமல் சொல்வது போல் 'எதிர்பாராததை எதிர்பாருங்கள்' என்ற கோட்பாட்டின்படி வனிதாவின் வெளியேற்றம் நிகழ்ந்திருக்கலாம். இப்போதெல்லாம் 'இது உங்கள் வாழ்க்கையின் பிரதிபலிப்பு' எனக் கமல் சொல்வதில்லை. பிக்பாஸ் குறித்த எழுத்துக்களை வாசிக்காமலா இருப்பாரு... அதான் மாற்றிக்கிட்டார்.

தர்ஷனும் மீராவுக்கு காதலாம்... அவன் வெளியில் எனக்கு ஆளிருக்கு என்ற சொன்னபோதும் அம்மாக்கிட்ட வந்து பொண்ணு கேளுன்னு சொன்னாங்களாம். இதைக் கமல் விசாரித்த போது தர்ஷனின் பேச்சு பொய்களற்று இருந்தது. மீராவோ நடந்ததை விடுத்து நிறையக் கலந்து டுவிட்டரில் கமலஹாசன் இடும் கவிதைகளைப் போல, புரியவும் புரிய முடியாமலுமாய் பக்கம் பக்கமாய்ச் சொன்னார். நமக்குத்தான் தலை சுத்துச்சுன்னா கமலுக்கும் கூட சுத்திருச்சி. அதென்ன இங்கே கண்டதும் காதல் வருகிறது. நேற்று சேரன் சொல்வது போல் யார்..? என்ன..? வெளியில் எப்படி..? குடும்பமென்ன..? என எதுவுமே தெரியாமல் காதல் வருவதெல்லாம் பிக்பாஸ் இல்லத்துக்குள்தான்... ஒருவேளை அடைக்கப்பட்ட ஒரு இடத்தில் ஆறுதலான வார்த்தைகள் கூட காதலாகுமோ..? ஆனாலும் மீராவைக் கட்டுனவனை பேசியே கொன்று விடும் என்பது மட்டும் உறுதி.. பாவம் தர்ஷன் உயிரைக் கொடுக்காதிருக்கட்டும்.

இல்லத்துக்குள் நிகழும் காதல் குறித்து கமல் பேசும் போது இங்க நீங்க ஒருநாள் வாங்க சார் நான் நிரூபிச்சிக் காட்டுறேன் என வனிதா காதல் தூது விட, கமல் சிரித்துச் சமாளித்தார். வனிதா வெளியில் வந்தபோது கூட உங்களை எல்லாம் நான் குழந்தை முதல் பார்த்து வருகிறேன் என்று சொல்லி அணைத்ததில் ஒரு அப்பனாய்த்தான் மிளிர்ந்தார்... காதல் இளவரசனாய் அல்ல.

காதல் பற்றி பேசும் போது இந்தத் தலைமுறையின் வேகத்தை வியந்ததுடன் அது சரியெனப் பாராட்டவும் செய்தார். முதியவர்கள் செய்யும் செயல்களில் தப்பிருந்தாலும் அவர்களைக் குழந்தைகளாய்ப் பார்க்கலாம் என்றது மோகன் வைத்யாவின் 'கட்டிக்கொடு' வைத்தியத்துக்காகக் கூட இருக்கலாம். அதென்ன கட்டிக்கொடு... பின்னாடி பார்க்கலாம்.

வெளியில் வந்தவர்களிடம் உள்ளிருப்பவர்கள் பற்றிக் கேட்கும் கமல், வனிதாவுக்காக மட்டும் சிறப்பாக அவரைப் பார்வையாளர்கள் மத்தியில் அமரச் செய்து, அவர் போய்விட்டாரெனச் சொல்லி அவரைக் குறித்துக் கேட்டார். எல்லாரும் நல்லவர் என்றே சொன்னார்கள். கவினும் தர்ஷனும் கூட சில விஷயங்களில் தவறு செய்தார் என்றாலும் அவர் நல்லவர்தான் என்றார்கள். மோகன் சொல்லவே வேண்டாம் நவரசநாயகனுக்கே நடிப்பு சொல்லிக் கொடுப்பாப்புல... இவரைப் பற்றி பின்னாடிப் பார்ப்போம். மத்தவங்க பிரச்சினையை அவங்களே பேசித் தீத்துப்பாங்க என்ற போதிலும் வனிதா புகுந்து அதை பெரிதாக்குவாரென லாஸ்லியா மனதில் உள்ளதைச் சொன்னார். அது மிகவும் உண்மையான நேர்மையான பதிலாய் பார்வையாய் இருந்தது.

குழந்தைகளை வைத்துக் கொண்டு ஒரு பெண் தனியே போராடுறதுங்கிறது சாமானியமானதல்ல... எத்தனை பிரச்சினைகள்... எத்தனை போராட்டம்... அதுவே வனிதாவுக்கு அழுத்தமான, அதிகாரக் குரலைக் கொடுத்திருக்கிறது. அவளைப் போன்ற வாழ்வை வாழ்பவள் என்ற முறையில் அவளின் செயல்கள் சரியானவைதான்... எதிலும் அவளின் தீர்க்கமான முடிவு ஏற்றுக் கொள்ளக் கூடியதுதான் என்ற ரேஷ்மாவின் பேச்சு ஏற்றுக் கொள்ளக் கூடியதே.

நீங்கள் பேசுவதை மற்றவர்கள் கேட்க வேண்டும் என்று நினைப்பதைப் போல் மற்றவர்கள் பேசவும் இடங்கொடுங்கள் என்று சொன்னதுடன் இப்போது உங்களுக்குப் புரிந்திருக்கும்... புரியலைன்னா உங்க வீட்ல இருக்க ரெண்டு டீச்சருங்ககிட்ட கேட்டுக்கங்க என வனிதாவின் குழந்தைகளைக் காட்டிச் சொன்னார் கமல். வனிதாவை அமர வைத்து வீட்டிலிருப்பவர்களிடம் கருத்துக் கேட்டது எதிர்பாராததை எதிர்பாருங்கள் என்றாலும் இது வனிதாவுக்காக மட்டுமே... பிக்பாஸ் டிஆர்பியை உயர்த்தியதற்கு கிடைத்த மரியாதை என்றுதான் சொல்ல வேண்டும். எல்லாருக்கும் இது போல் கிடைக்கும் என்றெல்லாம் சொல்ல முடியாது.

மோகன் வைத்யா... வயசானால் குழந்தை மாதிரி ஆயிடுவாங்க... அன்புக்கு ஏங்குவாங்க என்பதெல்லாம் நாமறிவோம்... ஆனால் மோகனின் செயல்களில் குழந்தைத்தனமும் இல்லை... அன்புக்காக ஏக்கமும் இல்லை... தன் பெண்மை கலந்த நடை உடை பாவனையைக் கேலி செய்வதாய் வருத்தப்படும் போது மட்டும் அவரின் வலி நமக்குள்ளும் கடத்தப்படுகிறது. அப்படியான கேலிகளைத் தவிர்த்தல் நலம். 

மோகன் கட்டிக்கொடு வைத்தியத்துக்காக அலைபவராகத்தான் தெரிகிறார். எதற்கெடுத்தாலும் சினிமாப்பாணிக் கண்ணீரைக் கொட்டுகிறார். ஊருப்பக்கம் ஆம்பளை அழக்கூடாது என்பார்கள். இவர் அழுதே காரியம் சாதிக்கிறார்... என்ன காரியம் கட்டிக்கொடுதான்... அதென்ன கட்டிக்கொடு வைத்தியம்... பெண்களைக் கட்டிப்பிடித்து முதுகு தடவி... உச்சி மோர்ந்து... கன்னத்தில் மாறி மாறி முத்தம் கொடுக்கும் வைத்தியம்... இந்த வைத்தியத்தில் வாங்குபவர் பலர் வேப்பெண்ணை குடித்தது போல் இருக்கிறார்கள் என்றாலும் கொடுப்பவருக்கோ திருப்பதி லட்டை முழுவதும் தின்ன மகிழ்ச்சி.

மீராவுக்கு தன்னைப் பற்றி தப்பான பிம்பத்தை தர்ஷன் ஏற்படுத்துகிறான் என கேமராவையும் வீட்டிலிருப்பவர்களையும் நம்ப வைக்க வேண்டும் என்பதால் விளக்கம் கேட்டு தர்ஷனை கொன்னு எடுக்க ஆரம்பிக்க, இனி எங்கூட பேசாதே... எங்கிட்ட வராதே என அவன் எஸ்ஸாகிடுறான். தர்ஷனுக்கு லாஸ்லியா மீது தங்கைப் பாசம்... கிடைத்த சாக்லெட்டைக் கூட லாஸ்லியாவுக்குத்தான் கொடுக்கிறான்... சேரனும் கொடுக்கிறார்... ஆனால் லாஸ்லியாவின் மனசெல்லாம் வேட்டையந்தான்... 

நாமினேசனில் மீராவுக்கு பதினோரு ஓட்டு... அப்புறம் சரவணன்... அதன் பின் சேரன், மோகன்... அபிராமியை நாமினேட் பண்ணினார் சாக்சி, தான் இந்த வார வெளியேற்றப்பட இருப்பவரில் தெரிவு செய்யப்பட்டதற்கு அபிராமி மகிழ்ச்சியை வெளிப்படுத்தினாலும் என்னை எதற்கு அவர்கள் சொன்னார்கள் என அழுது யோசிக்கிறார்... ஆறுதலாய் அபி...அபி என அருகிருக்கிறான் முகன். இவர்களின் காதல் மெல்லிய தென்றலாய் நகர்ந்து கொண்டிருக்கிறது.

பிடித்த, பிடிக்காத என இரண்டு கேள்விக்கான பதிலில் பெரும்பாலும் மீரா பிடிக்காததில் வந்தார். எங்கிருந்தாலும் கடைசி வரை லாஸ்லியாவை மகளாக நினைப்பேன் என்ற சேரன், இங்கிருந்து போனதும் மீராவை மறந்துடுவேன் என்றார். லாஸ்லியாவோ கவின் பேசுவது பிடிக்கும் என்றும் சாண்டி பேசுவது அறுவை என்றும் சொன்னார். கவினோ நல்ல மனசுக்காரன் சரவணன் என்றும் முரணானவர் சேரன் என்றும் சொன்னார். சாண்டியோ எம்புட்டு அடிச்சாலும் தாங்குவார் மோகன் என்றும் புரிந்து கொள்ள முடியாதவர் சேரன் என்றும் சொன்னார். அபிராமி வெறுக்க வேண்டியவள் மீரா என்றும் நேசிக்கக் கூடிய மனசுக்காரன் முகன் என்றும் சொன்னார்.  மீரா சேரனை எதிரியாகவும் தர்ஷனை நண்பனாகவும் சொன்னதுடன் தன்னை எல்லாரும் சொல்லக் காரணம் தானே எல்லாருக்கும் டப் கொடுக்கும் போட்டியாளர் என்று தனக்குத்தானே புகழாரம் சாற்றிக் கொண்டு, மீண்டும் எழுபதுகளின் நாயகியாய் நீண்ட வசனம் பேசினார். 

கவினை அண்ணன் என லாஸ்லியா சொன்னது அவனுக்குப் பிடிக்கவில்லை... அது குறித்து நாம நல்ல நண்பர்கள் மச்சான்... பின்னே எனக்கு நீ அண்ணன்னு சொன்னாப் பிடிக்காதுன்னு தெரிஞ்சும் சொல்றே பாத்தியான்னு சோகமழை பொழிந்து கொண்டிருந்தான். லவ் பண்றேன்னா சொல்லித் தொலையேன்டா... அபி, சாக்சியை மெல்லக் கழட்டிட்டான்...  நான் முதல் வாரத்திலேயே சொல்லியிருந்தேன் கவின் லாஸ்லியாவைத்தான் லவ் பண்ணுவான் என... மச்சான் சீனெல்லாம் வெறும் வெத்துக்கதை... அவனின் மனசுக்குள் அவளும்... அவளின் மனசுக்குள் அவனுமாய் இருப்பதை மறைக்கிறார்கள்... வரும் வாரங்களில் பூனை வெளிவரும்.

சமைக்கும் போது நீ போம்மா... என சரவணன் சொன்னதுக்கு பெரிய சீன் போட்டு கண்ணுல ஜலமெல்லாம் வச்சிக்கிச்சு மது... முடியலை... அந்தாளு நான் சமைக்கிறேன்னுதானே சொன்னாரு... என்னமோ ரொம்பத் திட்டிட்ட மாதிரி ஓவர் சீனு வேற.. இந்த வார நாமினேசனில் இல்லை...எப்படி இல்லாமல் போனாள் நாந்தானே ஓட்டுப் போட்டேன் என ரேஷ்மா முழித்தாளும் ஒரு ஓட்டெல்லாம் போட்டிக்குள் தற்போதைய நிலையில் கொண்டு செல்லாது என்பதால் தப்பித்தார்... இந்த வாரம் அதிக ஆட்டத்தை மதுவிடம் எதிர்பார்க்கலாம்.

தன்னை சரவணன் கிண்டல் செய்கிறார் என்ற ஒப்பாரி... சரவணன் நேரில் வந்து விளக்கம் கொடுத்தும் ஏற்றுக் கொள்ளாத மோகன்... இந்தாளுதான் பிக்பாஸ் வீட்டில் வாலி பட வில்லன் அஜீத் போல சைலண்ட் வில்லன்... போட்டுக் கொடுப்பதில் மன்னன்... வயசுக்குத் தகுந்த செயல்கள் இல்லை... 

சரவணன் மகனின் போட்டோவை அனுப்பிய பிக்பாஸ் சாண்டியைப் போல் சரவணன் அழுது... குதித்து... நன்றி பிக்பாஸ் என நாலு கேமரா முன் ஓடுவார் என நப்பாசை கொண்டிருந்திருப்பார்... செவ்வாழை என்ன பையன் போட்டாவா.. ம்... சரி என்றபடி வெங்காயம் உறிக்க ஆரம்பிக்க, ஆளாளுக்கு என்னென்னமோ சொல்லியும் சாண்டி உங்கண்ணு சித்தப்புன்னு சொன்னதும் கொஞ்சம் கலங்கினாரு...அம்புட்டுத்தான்... என்ன சித்தப்பு ரியாக்சனே இல்லைன்னு பிக்பாஸ் புலம்பியிருப்பாரு... அதுல முத்தாய்ப்பாய் நிகழ்ந்தது சரவணனை எதிரியாய்ப் பார்க்கும் மோகன் 'அய்...ச்ச்ச்சூச்ச்சூ...' என போட்டோவுக்கு முத்தம் கொடுத்தது. முன்னே சொன்னதுதான் உலக நாயகனுக்கே டப் கொடுக்கும் கலைஞன் இவர்.

மீரா இந்த வாரம் பிக்பாஸால் காப்பாற்றப்படுவார்... பிரச்சினைக்கு இவர் கண்டிப்பாகத் தேவை... மோகனும் காப்பாற்றப்படக் கூடும்... இவர்கள் இருவரும் இல்லையென்றால் பிக்பாஸ் அதிகம் எதிர்பார்த்து முதல் நாள் முதல்காட்சியிலேயே தூக்கி எறியப்பட்ட சினிமா போலாகும் என்பதை பிக்பாஸ் உணராமலா இருப்பார்..? அதேபோல் அபிராமி - முகன் காதல் சூடுபிடிக்கும் தருணத்தில் அபியை வெளியேற்ற பிக்பாஸ் என்ன முட்டாளா...?அதனால் இந்த முறை சரவணனோ சேரனோ பலிகடா ஆக்கப்படலாம். இதில் சேரனுக்கே 70% வாய்ப்பு இருக்கு. பார்க்கலாம் எதிர்பாராததை எதிர்பார்த்துக் காத்திருப்போம்.

பிக்பாஸ் தொடரும்.
-'பரிவை' சே.குமார்.

திங்கள், 15 ஜூலை, 2019



சினிமா : ஜூன் (மலையாளம்)


Related image
ஜூன்...

ஜூன் சாரா ஜோய்... என்னும் கதைநாயகியின் பெயரில் முதல் பாதியே படத்தின் தலைப்பாய்.

'பிரைடே பிலிம் ஹவுஸ்' தயாரிப்பில் பிப்ரவரி-15, 2019-ல் காதலர் தினத்துக்காய் வெளியான படம் இது. 

என்னைப் பொறுத்தவரை நல்லபடமென ஆஹா... ஓஹோன்னு புகழும் படங்களைப் பார்ப்பதைவிட, யாருமே புகழாமல் கிடக்கும் படங்களையே விரும்பிப் பார்ப்பதுண்டு. இந்த விதி தமிழ்ப் படங்களுக்கு மட்டுமே... ஜூன் மலையாளப் படம் என்பதால் அறியாத படமா இருக்கே என்றுதான் பார்க்க ஆரம்பித்தேன். மலையாளப் படங்களை விரும்பிப் பார்ப்பேன் என்றாலும் பார்க்கும் முன் எந்தப் படத்தின் விமர்சனத்தையும் வாசிப்பதில்லை. இது மலையாளப் படத்துக்கு மட்டும்...

மலையாளப் படங்கள் பார்த்து ரொம்ப நாளாச்சு என்பதால் சென்ற வார விடுமுறை தினத்தில் ஹாஸ்டலில் இருந்து மகளின் முதல் வருகைக்காக மனைவியும் மகனும் மதுரைக்குச் சென்று விட்டதால், அதுவும் அம்மா வீடு செல்லும் மகள்கள் எப்போது பிஸி என்பதால் போனிலும் பேச இயலாத,  பேசினாலும் தேவகோட்டையில் கிடைப்பது போல் அவ்வளவு சிறப்பாக கிடைக்காத நெட்வொர்க்கில் மகளுடன் பேசுவதே முடியாத நிலையில் வெயில் தகிக்கும் மதியத்தில் என்ன செய்யலாம் என வெள்ளியன்று கும்பளங்கி நைட்ஸ், சனியன்று ஜூன் என மலையாளப் படங்களைப் பார்த்தேன்.

எப்போதும் விரும்பிப் பார்க்கும் படங்களாய் மலையாளப் படங்கள் இருக்கக் காரணம் எதார்த்த நடிப்பும் தொய்வில்லாத் திரைக்கதையுமே... அதுதான் கும்பளங்கியிலும் ஜூனிலும்.

கிறிஸ்தவக் குடும்பத்து 'பனாமா' ஜோய் (ஜோஜூ ஜார்ஜ்) மற்றும் மினி ஜோய் (அஸ்வதி மேனன்) மகளான ஜூன் (ரஷிதா விஜயன்) -ஐ சுற்றியே கதை நகர்கிறது. பள்ளிப் பருவத்தில் இருந்து திருமணம் வரை நகரும் கதை சேரனின் ஆட்டோகிராப்பின் பெண் வெர்சன் என்று கூட சொல்லலாம். அப்படித்தான் பள்ளி, கல்லூரி, வேலை, திருமணம் என நகர்கிறது.

பதினோரம் வகுப்பின் முதல்நாள் பள்ளிக்குச் செல்லும் ஜூன் பள்ளிச் சீருடையில் கூட மாடர்ன்னாக செல்ல நினைக்கிறாள். அம்மாவோ பிக்பாஸ் மது மாதிரி கலாச்சாரக் காவல்காரி என்பதால் திட்டி, சாதாரணமாகப் போகச் சொல்கிறாள். 

மழை... குடையில்லாமல் நனையும் மாணவ, மாணவிகள்... அந்த மழையிலும் வீடியோ எடுத்துக் கொண்டிருக்கும் மாணவன் நோயல் (ஷர்ஸானோ காலித்) மீதான முதல் பார்வையே ஜூனுக்கு காதலைக் கொடுக்கிறது. அதன்பின் ஒரே வகுப்பில் பல நாயகர்கள் பல நாயகிகளாய்... பதின்ம வயதுக் காதல்... இதைப் பருகாத சினிமாக்கள் இந்திய மொழிகளில் இல்லாதிருத்தல்தான் ஆச்சர்யம். பதின்மத்தில் எப்படிக் காதலிப்பதென பாடம்தானே எடுக்கின்றன இப்போதைய படங்கள்.

Image result for june malayalam movie postershd

பள்ளிக் காதலில் கலையரங்கத்தில் நிகழ்ச்சி நடக்கும் போதே கொடுக்கப்படும் சிறு முத்தம் காதலினைச் சொல்லிச் செல்கிறது, அதன் பின்னான நாட்கள் நகர்வில் காதலும் நகர்கிறது பள்ளி மட்டுமின்றி வீட்டுக்கும் போனின் வழி... அப்பா, அம்மா பார்க்கிறார்களா..? அப்ப போனை எடுக்காமல் இருக்காதே... பேசும் போது கட் பண்ணாதே... சந்தேகம் வரும்... அப்ப பவ் (PAW - Parents are Watching) என்று சொல் புரிந்து கொள்வேன் என படிக்கும் பிள்ளைகளுக்கு புதிய வார்த்தையைக் கத்துக் கொடுக்கிறார்கள். இந்தப் படம் வந்த போது பல வீடுகளில் 'பவ்' என்ற வார்த்தைகள் அடிக்கடி கேட்டிருக்கும்.

 மகள் மீது அதீத பாசம் கொண்ட அப்பா, பதினைந்து வயதுப் பெண்ணுக்கு பீர் ஊற்றிக் கொடுத்துக் குடிக்கச் சொல்கிறார். கிறிஸ்தவக் குடும்பம் என்பதால் ஏற்புடையது என்றாலும் கொஞ்சம் அதிகமாகத் தெரிகிறது. இன்றைய சினிமாக்களில் பெண்கள் தண்ணி அடிப்பது என்பது தவறில்லை என்பதாய்த்தான் போதிக்கப்படுகிறது. சினிமாவில் மட்டுமின்றி நிஜ வாழ்க்கையில் பள்ளிக் குழந்தைகள் தண்ணி அடிக்கும் வீடியோக்கள் வாட்ஸப், பேஸ்புக், டுவிட்டர் என வலம் வந்து கொண்டுதான் இருக்கின்றன. நம் பிள்ளைகளை நாம்தான் சூதனமாகப் பார்த்துக் கொள்ள வேண்டும். இதில் கூட நாயகியின் அறிமுகம் 'அண்ணே ஒரு பச்சைப் பீர்' என்பதாய்தான் இருக்கிறது.

சினிமாக்கள் மட்டுமல்ல் சமூக வலைத்தளங்கள் கூட எல்லாம் கற்றுக் கொடுக்கத்தான் செய்கின்றன. சமீபத்தில் நாகர்கோவில் கல்லூரியில் நடக்கும் காமக்களியாட்ட வீடியோ நாகர்கோவில் நண்பருக்கு வந்தது... வெட்ட வெளியில்... நம் தமிழ்ப்பெண்கள்... கல்லூரிப் பெண்கள்... எங்கே போச்சு தமிழ் பொண்ணு... மண்ணு... கலாச்சாரம் எல்லாம். இதையெல்லாம் இனிக் கடந்துதான் நாம் குழந்தைகளைப் பாதுகாப்பாய் வளர்க்க வேண்டும்... இனி வரும் காலங்கள் பெண் பிள்ளைகள் என்றில்லை ஆண் பிள்ளைகளை வைத்திருக்கும் பெற்றோர் கூட எல்லாவிதத்திலும் கவனமாய் பிள்ளைகளை பார்த்து வளர்க்க வேண்டும்.

எனக்குன்னு எந்த ஒரு தனித்திறமையும் இல்லை ஆனா நான் நானாத்தான் இருப்பேன் என்று சொல்லும் ஜூனுக்கு பல்லில் போட்டிருக்கும் கம்பி கூட அழகினைக் கெடுப்பதாய்த்தான் தெரிகிறது என்றாலும் அவளிடம் ஒரு தேவதை தெரிகிறாள். அந்தத் தேவதை எதையும் பற்றிக் கவலை கொள்ளாமல் ஜாலியாகத் துள்ளித் திரிகிறாள்.

குடிக்கக் கொடுக்கும் அப்பாவின் செல்லப்பிள்ளை அவள்... அப்பாக்களுக்கு எப்பவுமே பெண் பிள்ளைகள் செல்லம்தானே... இன்று ஹாஸ்டல் போக வேண்டும் என்ற போது மதியம் போனை எடுத்து 'அப்பா' எனும் போதே அழுத மகள் இரவு ஹாஸ்டல் அறைக்குச் சென்ற பின்னும் போனில் அழத்தான் செய்தார்... எனக்குள்ளும் மனக்கலக்கம் மதியம் முதலே... மக அழுதுன்னதும் போனடிச்சிக்கிட்டே இருக்காக... இதே நானாயிருந்த சரி சரி அழாதேன்னு சொல்லிட்டு போனைக் கட் பண்ணியிருப்பாங்கன்னு விஷால் இப்பப் பஞ்சாயத்து... பெண் குழந்தைகள் எப்போதும் அப்பாக்களுககுத் தங்கமீன்களே... எங்க வீட்டில் ரெண்டுமே தங்க மீன் என்றாலும் விஷால் அப்படித்தான் பேசுவான் எல்லாம் ஜாலிக்காகத்தான்.

ஜூன் தன் அப்பாவை நண்பனாகத்தான் பார்ப்பாள்... எல்லாமும் பேசுவாள்... அப்படித்தான் போதையேறிய இரவில் அப்பாவிடமே காதல் பற்றியும் பொதுவாகப் பேசுகிறாள்... அவரோ அது தப்பில்லை என்று சொல்லி ஆனா நான் உனக்கு நான்தான் ராஜகுமாரனைப் பார்த்துக் கட்டி வைப்பேன் என்கிறார். அந்த அன்பில் உடைகிறாள் என்றாலும் காதல் தொடர்கிறது. 

நண்பர்களுடன் அடுத்துச் செல்லவிருக்கும் கல்லூரியைக் காண தனியாய்ச் செல்வதில் ஆரம்பிக்கிறது பிரச்சினை... அம்மா அழுது ஆர்ப்பாட்டம் செய்கிறாள்... அப்பா ஒடிந்து போய் அமர்ந்திருந்தாலும் மகளின் அழுகை... இனிமேல் பண்ண மாட்டேம்பா என மனதிலிருந்து வெடித்து வரும் சொல்... இவற்றில் கரைந்து விழுகிறார்... அணைத்துக் கொள்கிறார். அவளும்  என் அப்பா, அம்மாதான் முக்கியமென காதலைக் கரைத்துக் கொள்கிறாள்... அவனும் அதே போல் சொல்லி வெளிநாட்டுக்குப் படிக்கப் போய் விடுகிறான்.

கல்லூரி முடித்து மும்பையில் அவனிருக்கிறான் என அங்கிருக்கும் தோழி மூலம் அறிந்து அப்பாவிடம் வெளியூரில் வேலை பார்க்க அனுமதி வாங்கி அங்கு பறக்கிறாள். அவனைப் பார்க்கிறாள்... மீண்டும் புதுப்பிக்கிறாள் தன் காதலை... பணக்காரக் குடும்பத்தின் ஆணவப் பேச்சு பிக்பாஸ் வனிதாவின் பேச்சாய் வார்த்தைகளை அள்ளித் தெளிக்க, மீண்டும் பிரிவு... வருத்ததுடன் ஊருக்கு வருகிறாள்.

நியூ இயர் இரவு...

பீர்... ஆட்டம்... அடிதடி... போலீஸ் ஸ்டேசனில் அழுது ஆர்ப்பாட்டம்... போலீஸ் இன்ஸ்பெக்டரின் நல்ல உள்ளம் என நீண்டு நகர்கிறது ஏர்ப்போர்ட்டில் இறங்கிய அந்த இரவு. மறுநாள் அவளை அழைத்துச் சென்று பஸ் ஏத்திவிட இன்ஸ்பெக்டர் காட்டும் கான்ஸ்டபிள் ஆனந்த் (அர்ஜூன் அசோகன்), அவளின் பள்ளிக் கல்லூரி நண்பன்...  தன்னை ஒருதலையாக காதலித்தவன் என்பதால் இவனுடன் போகணுமா என்று யோசித்தவள், பின் அவனுடன் பயணம்... அவன் வீட்டில் தங்குதல்... அவனின் அம்மா காட்டும் காதல் சம்பந்தமான பொருட்கள், அவனுடன் பஸ் பயணம், சாப்பாடு, நடை என மீண்டும் ஒரு காதல் பயணம்...

சொந்தத் தொழில் செய்பவள் திருமணம் செய்யாமல் இருப்பது  சரியல்ல என்பதால் பெற்றோரின் வற்புறுத்தலுக்காக சரியென்கிறாள்... மாப்பிள்ளையாக வருகிறான் மூன்றாமவன் சன்னி வெய்ன்... அவனுடன் தனித்துப் பேசும் போது அவனின் அன்பில் வீழ்கிறாள். சம்பிரதாயத்துக்காகத்தான் இந்தப் பெண் பார்க்கும் படலம் என்றவள் திருமண வாழ்க்கைக்குத் தயாராகிறாள்.

திருமணத்துக்காக நண்பர்கள் அனைவரும் வருகிறார்கள்... நோயலும் வருகிறான்... ஆனந்தும் வருகிறான்... காதலித்துத் திருமணம் செய்தவர்கள், காதலித்துப் பிரிந்தவர்கள், நட்பில் பிரிந்தவர்கள் என எல்லாருமெ வருகிறார்கள்... அவர்களின் டீச்சரும் வருகிறார். இறுதிக்காட்சி மிகச் சிறப்பு... கண்ணீரை வரவைக்கும் காட்சி... செம திரைக்கதை.

Related image

படத்தை முழுக்க முழுக்க ரஷிதாதான் தூக்கிச் சுமக்கிறார்.... ஜாலியாய்... கோபமாய்... நேசமாய்... என எல்லாமுமாய்க் கலந்து கட்டி ஆடியிருக்கிறார்... வாழ்த்துக்கள் ரஷிதா.

இசையில் கட்டிப் போடுகிறார் இப்தி, அறிமுக இயக்குநர் அகமத் காபீர் சிறப்பான திரைக்கதையை தொய்வில்லாமல் கொடுத்திருக்கிறார்.

ஜித்தின் ஒளிப்பதிவு அருமை...

கதையைத் தொய்வில்லாமல் நகர்த்திய லிஜோ பாலின் எடிட்டிங்கும் செம.

ஜூன் பார்த்து ரசிக்கக் கூடிய படம்தான். பள்ளிக்கூட காதல் கூட மிக நேர்த்தியாய் எந்த ஆபாசமும் இன்றி எடுத்துச் செல்லப்பட்டிருப்பது வரவேற்கத்தக்கது.
-'பரிவை' சே.குமார்.

ஞாயிறு, 14 ஜூலை, 2019



பிக்பாஸ் : கணக்குத் தீர்த்த கமல்

Image result for bigg boss tamil 13th july 2019
பிக்பாஸ் - கமலஹாசன் வரும் இரண்டு நாட்கள் எப்பவுமே சிறப்பானவைதான்... நிறைய விஷயங்கள் பேசுவார்... கொஞ்சம் குழப்பினாலும் நிறைவாய்ப் பேசுவார். நேற்றைய நிகழ்ச்சியிலும் வரும் போதே தீர்க்கப்படாத கணக்குகள் நிறைய இருக்கு... இன்னைக்கு எல்லாத்தையும் தீர்த்திடலாம்... என்றபடியே வந்தார்.

எந்த விஷயத்திலும் முடிவை எட்ட மாட்டேன் என்கிறார்கள். பிரச்சினையை ஆரம்பிப்பவரும் சரி எதிர்ப்பவரும் சரி நின்று பேசுவதில்லை. வீட்டில் அப்பா சத்தம் போடும் போது பிள்ளைகள் அதைக் கவனிக்காதது போல வேறு எதாவது செய்வது போல் பலர் இருக்கிறார்கள். இன்னும் சிலரோ காதில் விரலை வைத்து அடைத்துக் கொண்டு வேறு பாட்டுப் பாடி அப்பாவின் திட்டைக் கேட்காத மாதிரி நடிப்பதைப் போல் நடிக்கிறார்கள். ஒருத்தர் சண்டை ஆரம்பித்ததும் சாமி கும்பிடப் போய் விடுகிறார் என்றெல்லாம் பேசி வீட்டு நிகழ்வுகளைப் பாருங்க எனப் போய்விட்டார்.

'சொடக்கு மேல... ' பாட்டோட, சின்னக் குத்தாட்டத்தோட விடிந்தது வெள்ளிக்கிழமை காலை, வனிதா மழலையர் பள்ளி ஆசிரியராகப் பாடம் நடத்தினார். சாண்டியின் சேட்டைகள் ரசிக்க வைத்தது. தினமும் ஆட்டத்துக்குப் பிறகு இப்படி ஒரு இத்துப்போன டாஸ்க் வேற... இது எதுக்குன்னே தெரியலை... இருந்தாலும் அதையும் ரசிக்க வைத்தது சாண்டியின் நகைச்சுவை.

சமையலில் தீவிரமாய் சரவணனும் கவினும் மற்றவர்களும்... மது சும்மா அதெப்படி.. இதெப்படி என்றெல்லாம் கேட்டுக் கொண்டிருந்தார். அதன் பின் அவர் வைத்த சாம்பாரை மோகனும் கவினும் புகழ்ந்து தள்ள, மதுவுக்கு முகமெல்லாம் பல்லாய் பூரிப்பு.

மாமியா உடைச்சா மண் குடம் மருமக உடைச்சா பொன் குடம்ன்னு ஊர்ல ஒரு பழமொழி சொல்லுவாங்க, அப்படி ரேஷ்மாவும் வனிதாவும் மதுவுக்கு தமிழ்ப்பொண்ணுங்கிற பற்று இருக்க அளவுக்கு சமையல்ல ஒண்ணும் தெரியலை... கூமுட்டை எனப் பேச, வனிதா உடனே நேரே வந்திடுறாங்க... சமையல் சொல்லிக் கொடுக்கும் டீச்சரைப் போல... அந்த இடத்தில் சரவணன் சமயோகிதமாய் மதுவிடம் யாரப்பற்றியும் கவலைப்படாம உன்னோட வேலையை மட்டும் பாரு மற்றதெல்லாம் நான் பார்த்துக்கிறேன் எனச் சொல்ல, அங்கு உடைபட்டது வனிதாவின் மூக்கு என்பதை பார்த்தவர்கள் அறிவார்கள்.

பாவம் இந்த லாஸ்லியா, நல்ல புள்ளையாத்தான் இருந்துச்சு... கவினை லவ்வுறேன்னு சும்மா சோகமா முகத்தை வச்சிக்க ஆரம்பிச்சிருச்சு. அவன் வேற 'இங்க பாருடா மச்சான்' அப்படின்னு கிளாஸ் எடுக்க ஆரம்பிச்சிடுறான். அடேய் முதல்ல இந்த மச்சானை விடுங்கடா... முடியலை.

சாப்பிடும் போது சாம்பார் சரியில்லை... புளி நிறையச் சேக்கலைன்னு ரேஷ்மா, சாக்சி மற்றும் வனிதா பேசுறாங்க... அதுல ஒருபடி மேல போயி சிக்கன் காலையில நல்லாயிருந்து இப்ப நல்லாயில்லை பாத்தியா.... சூட்டோட நக்குனா நல்லாத்தான் தெரியும்... ஆறினதும்தான் எப்படி இருக்குன்னு தெரியும் என வனிதா சாப்பாட்டுக்குள் மதுவை நிறுத்தி, மல்லுக்குத் தயாரானார். வனிதா தொடரும் பட்சத்தில் சாப்பாட்டுப் பிரச்சினைக்காக இந்த வாரத் தலைவரான சாக்சி மண்டை உருளக்கூடும்.

எப்பவும் சாப்பிடச் சொன்னா உடனே சாப்பிட்டுருவா... இப்ப என்னன்னா எனக்குப் பசிக்கலைன்னு சொல்றா என லாஸ்லியா குறித்து கவினிடம் ஒரு தகப்பனாய் கவலைப்பட்டார் சேரன். அதுக்காக லாஸ்லியா தோள்ள கை போட்டு அணைச்சி... சேரன் மகளாக இருந்தாலும் பொதுவெளி என்றாகும் போது தகப்பனாய் இருத்தல் நலம்.

தர்ஷனுடன் மீராவுக்கு கிரஷ்ஷாம்... ஸ்ஸ்ஸ்... அப்பா... என்ன நடக்குதுன்னே புரியலை... இவங்க பேசும் போது லாஸ்லியா குறுக்க வந்தாராம். அதுக்கு அப்புறம் புறம் பேசினாராம்... மீரா தன்னோட சண்டைக் கிண்ணத்தில் லாஸ்லியாவை அமுக்க, தர்ஷனோ அவள் சின்னப்பிள்ளை என்க, லாஸ்லியாவுக்கு கோபம் வந்தாச்சு... எதாயிருந்தாலும் எங்கிட்ட பேசு... மத்தவங்கக்கிட்ட கதைக்காதேன்னு ஒரு தென்றல் புயலாகியது.

மறுநாள் 'ரகுபதி ராகவ ராஜாராம்' பாடலுடன் விடிய, லாஸ்லியா குறித்த புகாரை சாக்சியிடம் சொல்லிக் கொண்டிருந்தார் மீரா... சாக்சி தலைவராக இல்லாமல் தன் காதலனை வளைத்துப் போடத்துடிக்கும் லாஸ்லியாவின் எதிரியாய்க் கேட்டுக் கொண்டிருந்தார். கவினும் சாண்டியும் கமல் குறித்த பாடலைப்பாட முகின் தாளமிசைத்தார்.

அகம் டிவி வழியே அகத்துக்குள் போனார் கமல்... அங்கே புல் மேக்கப்பில் தொடை தெரியும் உடைகளில் பெண்களும் எப்பவும் போல் உலர்ந்த முகத்துடன் ஆண்களும் அமர்ந்திருந்தனர். கொலைகாரி டாஸ்க்கை வெற்றிகரமாக முடித்த வனிதா மற்றும் முகினைப் பாராட்டி, நகைச்சுவை என்பது ஒரு கலை, அது எல்லாருக்கும் வாய்ப்பதில்லை என்று சொல்லி வீட்டுக்குள்ளும் வெளியிலும் எல்லாரையும் சிரிக்க வைக்கும் சாண்டியைப் பாராட்டினார்.

சாண்டியும் கவினும் கமலைப் பற்றி பாட்டொன்று எழுதி வைத்திருப்பதாக சேரன் சொல்ல, (அந்தப் பாடல் முன்னரே வந்தது - மேலே சொல்லியிருப்பேன்) கமலஹாசன் தெரியாது போல் அப்படியா எங்கே பாடுங்களேன் என்று சொல்ல, அண்ணாத்தே ஆடுறார் மெட்டில் செமையாப் பாடுனாங்க... 'வாரத்துல ரெண்டு நாளு வருவாரு... எல்லாரையும் டார்டாரா கிழிப்பாரு', 'கலைத்தாயின் மூத்தபிள்ளை... தமிழ்நாட்டின் தத்துப்பிள்ளை...' என செமையான வரிகள்... இதில் தத்துப்பிள்ளைக்குப் பதில் செல்லப்பிள்ளையின்னு இருந்திருக்கலாம். நார்நாராக் கிழிப்பேன்னு தெரிஞ்சிருந்தும் அதை மறந்துட்டுத்தானே பேசுறீங்க என கமல் சிரித்தார்.

பேச வேண்டிய இடத்தில் பேசலாமே என லாஸ்வியாவிடம் கொக்கியைப் போட வனிதா - தர்ஷன் சண்டையில் தர்ஷன் அண்ணா செஞ்சது சரிதான் என்பதால் நான் பேசவில்லை. எதற்கு மன்னிப்புக் கேட்டாய் எனவும் கேட்டேன்.  என்றார். மேலும் நீங்க ஜெயிலுக்குப் போறேன்னு நிற்கக் காரணம் என்றதும் 'சேரன் அப்பாவுக்காகவும் மேலும் எனக்கு பிக்பாஸ் எதுவும் சொல்லவில்லை என்றாலும் மதுவையும் சேர்த்துக் கொண்டு நான் கொஞ்சம் காரியங்கள் செய்தேன். அது நல்லதா கெட்டதான்னு தெரியாததால அதுக்காகவும் ஜெயிலுக்குப் போக நினைத்தேன். யாரும் என்னைக் கதைக்க விடலை' என்றார். அப்போது வனிதா விளக்கம் அளிக்கும் விதமாகப் பேச, ஆனாலும் நீங்க அந்த நேரத்தில் உன்னைய நல்லவளாக விடமாட்டேன்ன்னு சொன்னீங்கதானே. எத்தனை பேர் கவனிச்சாங்கன்னு தெரியாது என்றார் கமல்.

அதன் பின்னர் லாஸ்லியாவின் மைனாம்மா கதையைச் சொல்லச் சொன்னார். மைனா வளர்த்த கதையைச் சொல்ல ஆரம்பித்த போது சக பயணிகளில் குறிப்பாக பெண்கள் முகத்தில் இவ கதை சொல்லி... என்ற இகழ்ச்சி தெரிந்தது. மைனா கதைதானே... நாமல்லாம் வளர்க்கலையா என்ன என எனக்கும் தோன்றியது... கதை சொன்ன விதம் மெல்ல ஈர்த்தது என்றால் முடிவின் சோகம் மனதை வாட்டியது. பார்வையாளர்களில் ஒருவர் கலங்கிய கண்ணைத் துடைத்தார் என்பதை ஒரு நொடி கடந்து சென்ற கேமராவில் எத்தனை பேர் பார்த்தார்கள் என்பது தெரியாது என்றாலும் நான் பார்த்தேன்... என் கண்ணும் கலங்கியிருந்தது.

அபிராமி - மது பேச்சுக்குறித்து குறிப்பாக சிறு குழந்தைகளை பாலியல் வன்கொடுமை செய்வது குறித்துப் பேசியவர், அபிராமி பேசியது சரியே...  ஆனாலும் இங்கு கொடுத்த விளக்கத்தை அங்கு கொடுக்கவில்லை... கொடுத்திருக்க வேண்டும் என்றார். மேலும் மதுவின் பழமைவாதக் கொள்கைகளைச் சாடியதுடன் அதிலிருந்து வெளிவர வேண்டும் என்றார். மது அப்படியில்லை சார்... இப்படி என்ற போதும் கமலின் பேச்சும் உடையை வைத்தோ அல்லது இதற்கெல்லாம் பெண்கள்தான் காரணம் என்றோ சொல்வதை வன்மையாகக் கண்டிக்கிறேன் என்றார். அருமையானதொரு பேச்சு இது.

இதில் குறுக்கிட்ட வனிதாவிடம் நீங்கள் ரெண்டு பேரும் சொன்னதைச் செவி வழி கேட்டவர்கள் நான் பார்த்தவன் என்று சொல்லி உங்கள் குரலே ஓங்கி ஒலிக்க வேண்டும் என்று நினைப்பது தவறு. மற்றவர்களையும் பேச விட வேண்டும் என்றார். என்னைக் கொன்றவள் அபிராமிதான் அவளைப் பலி வாங்குவேன் என்று கொலையாளி டாஸ்கில் சபதம் செய்த சாக்சியிடம் இவர்தான் கொன்றிருப்பார் எனக் கொதித்த உங்களிடம் வனிதாதான் கொலைகாரி என்ற போது அந்தக் கொதிப்பு இல்லையே ஏன்..? என கிடுக்குப்பிடி போட, அவரோ கவின்தான் கொன்றிருப்பான் என்பதால் மச்சான் உன்னைய பலி வாங்குவேன் என்று சொன்னதாகச் சொல்ல, இது மச்சான் பற்றி அல்ல மச்சினி பற்றி என அடித்தாரே பார்க்கலாம். சாக்சிக்கு சங்கடம்... அபிராமிக்கு தான் தவறு செய்யாதவள் என்ற மகிழ்ச்சி.

மீன் மார்க்கெட் பிரச்சினையையும் பேசி எனக்கு மீன் மார்க்கெட் ரொம்பப் பிடிக்கும் என்ற கமல் எந்த விஷயத்தையும் பேச ஆரம்பித்து பிரச்சினை என்றாகும் போது அங்கிருந்து நகரும் அபியையும் லேசாக ஒரு பிடி பிடித்தார்.

தர்ஷன் - வனிதா பிரச்சினையைப் பேசும் போது தர்ஷன் தன் பக்க நியாயத்தை மீண்டும் எடுத்துச் சொல்ல, அரங்கத்தில் கைதட்டல் அடங்க நேரமானது. வனிதாவோ தன் நியாயத்தைச் சொன்னார். மோகனும் நான் நீச்சல்குளத்தைச் சுற்றிச் சுற்றி ஓடினேன் சார் என பஞ்சாயத்துக்குள் வந்தார். வனிதா பேசும் போது குறுக்கிடக்கூடாது எனச் சொல்லியிருக்கிறார் எனவே அப்போது எதுவும் பேசுவதில்லை... அதன் பின் சொன்னால் கேட்டுக் கொள்வார் என சேரன் பூசி மெழுக, அப்படியே விட்டால் எப்படி... அப்புறம் அவரை யார்தான் சொல்லித் திருத்துவது... வீட்டில் என்றால் பரவாயில்லை... நூறுநாளில் அப்புறம் சொல்வோம் எனத் தள்ளிப்போட்டால் தான் செய்வதை யாருமே தட்டிக் கேட்கவில்லை அப்ப நான் சரியானவள்தான் என்ற எண்ணத்தை அல்லவா எடுத்துச் செல்வார் என்றவர் உங்கள் வாய்ஸே உயர்வாய் இருக்க வேண்டும் என்று நினைக்காதீர்கள்... மற்றவர்கள் பேச்சுக்கு செவி கொடுங்கள் என்றார்.

தர்ஷன் பிரச்சினையில் வனிதா 'நேற்றுப் பெய்த மழையில் இன்று முளைத்த காளான்' என்று சொன்னதைப் பற்றிப் பேசிய போது சின்னப்பையன் என்ற அர்த்தத்தில் சொன்னேன் என்ற வனிதாவிடம் 'தழல் வீரத்தில் மூப்பென்றும் குஞ்சென்றும் உண்டோ..?'எனப் பாரதி பாடலைப் பாடி விளக்கம் கொடுத்தார். தர்ஷன் நான் அக்காவெனத்தான் அழைத்துச் சண்டை போட்டேன் என்றான். வனிதாவும் தன் தவறை உணர்ந்து அமர்ந்திருந்தார். மன்னிப்புக் கேட்டேன் என்பதையும் சொன்னார்கள் இருவரும். போன வாரத்தில் தர்ஷன் பேசலைன்னு சொன்னா நான்தான் மன்னிப்புக் கேட்கணும் என்றார்.

தர்ஷனைப் பின்னால் பாராடியவர்களையும் குட்டத் தவறவில்லை உலகநாயகன். 

இந்த வார வெளியேற்றம் சற்றே வித்தியாசமாய் என வீட்டுக்குள் வைக்கப்பட்ட வெளியேற்றக் கவரை சாண்டியை எடுத்து வரச் சொல்லி, அவரையே பிரிக்கவும் சொன்னார். அதற்கு முன்னர் வெளியே போறவங்க உள்ள இருக்கவங்களுக்கு என்ன சொல்றீங்கன்னு கேட்டதும் ஆளாளுக்கு அறிவுரை.. மதுமிதா, மோகனெல்லாம் கொஞ்சம் ஓவராய்... வனிதா மட்டுமே உள்ளதை உள்ளபடி போட்டுக் கொடுக்கவும் தயங்காதீங்க என்றார். அப்பத்தானே வீட்டுக்குள் பத்திக்கும்... பத்திக்காத வீடு பிக்பாஸூக்கு எதுக்கு... 

சாண்டி பிரிக்க அதில் மோகன் வைத்யா பெயர் வர, ஆளு அழுது ஆர்ப்பாட்டம் பண்ணியதுடன் பெண்களைக் கட்டிப்பிடித்து... எப்பா... முடியலை... என்ன இப்பத்தான் இப்படியிருங்க... அப்படியிருங்கன்னு அறிவுரை சொன்னீங்க... சந்தோசமாப் போவேன்னு சொன்னீங்க... இப்ப அழுறீங்க... என்றவர் நீங்க வீட்டில் தொடருவீங்க என்றதும் ஆர்ப்பாட்டம் செய்தார் மோகன். எங்கே இது உள்ள இருக்கத்தானே எனக் கேட்டுக்கிட்டே இருந்த மது காட்டிக் கொடுத்துருவாரோன்னு பார்த்தேன் என்றும் கமல் சொல்ல... மோகனின் பேச்சும் நடிப்பும் சுத்தமாக பிடிக்கவில்லை... மோகன் காப்பாற்றப்பட்டதில் 12 கோடி வாக்குகள் என்று கமல் சொன்னதில் பங்கு இருக்கோ இல்லையோ விஜய் டிவிக்கு முக்கியப் பங்கிருக்கு... ஏனென்றால் மோகனைப் போன்ற பிரச்சினைகளைத் தூக்கிச் சுமக்கும் ஆண்கள் அங்கில்லை. இவர் வேண்டும் பிக்பாஸ் டிஆர்பிக்கு.

வனிதா, சரவணன், மீரா, மது  வெளியேற்ற வேண்டியவர்களில் இதில் மது காப்பாற்றப்படுவார்... சரவணன் வீட்டுக்குள் வேண்டும்... மீராவா வனிதாவா என்பதுதான் இன்றைய எதிர்பார்ப்பாக இருக்கும் என்றாலும் வனிதா வெளியேற்றப்பட்டார் என்ற செய்திகள் வருவது  எந்தளவுக்கு உண்மையின்னு தெரியலை... வனிதா போவதை பிக்பாஸ் விரும்புவாரான்னு தெரியலை. பொறுத்திருந்து பார்ப்போம்.

பிக்பாஸ் தொடரும்.
-'பரிவை' சே.குமார்.

சனி, 13 ஜூலை, 2019



பிக்பாஸ் : சிக்ஸர் அடிக்கும் தர்ஷன்

Image result for biggboss 3 14 episode images
(தர்ஷன்)
பிக்பாஸ் கடந்த மூன்று நாட்களில் நேற்றைய பகுதி தவிர்த்து மற்ற இரண்டும் மரண மொக்கை. கொலை செய்யும் பட்ஜெட் டாஸ்க், வனிதாவிற்காகவே வைத்தது போல சுவராஸ்யமில்லாமல் நகர்ந்து கொண்டிருந்தது.

கவினும் சாண்டியும் பாடல்களைப் பாடி மற்றவர்களுக்குச் சொல்லிக் கொடுக்க, கவினின் 'அடியே லாஸ்லியா... என்னைப் பாத்தியா...' பாடல் செம.

மோகன், சாக்சி, ஷெரின் வரிசையில் ரேஷ்மா காபியை உடையில் சிந்திக் கொல்லப்பட்டார். முகன் காபியை ஊற்றும் போதே புரிந்திருக்க வேண்டும்... ஆனால் புரியலை. எப்பவும் போல் சாண்டி அன் கோ மேளதாளத்துடன் அவரை வழி அனுப்பியது.

இறந்தவர்களின் நினைவைப் போற்ற சுடுகாட்டில் அஞ்சலிக் கூட்டம்... சேரன் பேசும் போது எந்த நாய் பண்ணுச்சோ தெரியலைன்னு சொன்னப்பல்லாம் வனிதா முகம் போனதைப் பார்க்கணுமே... எப்படியும் சேரனுக்கு ஒரு காட்டு இருக்கு. சாண்டி ரொம்பச் ஜாலியாக் கிண்டல் செய்தார். தர்ஷனோ என் லவ்வர் ஷெரின் எனக் கலாய்த்தான். மதுமிதா... ஆமா இந்தம்மா என்ன பேசுச்சு... எதுக்குப் பேசுச்சு... சாண்டி சொன்னது மாதிரி ஜாலியான்னு சொல்லி எல்லா உண்மையையும் பத்த வச்சிட்டியேம்மா... உனக்கு ஏம்மா இந்த வேலை.

சாண்டி ஜாலியாய் பேசுவதையெல்லாம் மோகன் கோபமாய் எடுத்துக் கொள்கிறார். மீரா தேவையேயில்லாமல் நீ நேற்று வேலை பார்க்கலை என்று சொன்னதை மற்றவர்களிடம் சொல்லி அதை பிரச்சினையாக்கி நானே நல்லவள் என்பதாய் சீன் போட்டு சேரனுடன் மோதிக் கொண்டிருக்கிறது.

இந்தக் கொலைகளைத் துப்புத் துலக்க பிக்பாஸால் இன்ஸ்பெக்டராக கவினும் அவருக்கு உதவியாய் மீராவும்... விசாரணை என்ற பெயரில் உப்புச் சப்பில்லாத காட்சிகளாய் நகர்த்தினார்கள். கொலையாளி வெளியிலிருந்து வரலை... வீட்டுக்குள்தான் இருக்கிறான்... யார் என்ன செய்கிறார்கள் என்பதை கூர்ந்து கவனித்தாலே போதுமானது... முந்தைய சீசன்களில் இதே போன்ற திருடன் போலீஸ் டாஸ்க்கில் எல்லாம் அவர்கள் எப்படிச் செயல்பட்டார்கள் என்ற அறிவு சுத்தமாக இந்தக் கூட்டத்துக்கு இல்லை. தன் மேல் முகன் வேண்டுமென்றே காப்பியைக் கொட்டியது கூட தெரியவில்லையாம் ரேஷ்மாவுக்கு. ஒண்ணு தத்தின்னா பரவாயில்லை... எல்லாமே தத்தியின்னா... :(

கவினும் இதுதான் சாக்கு என சாக்சியை வெறுப்பேற்ற லாஸ்லியாவுடன் சாப்பிடுகிறான். சேரன் போட்டுக் கொடுக்க, அங்கே சக்களத்தி சண்டைக்கான அறிகுறி... கவின் பேசி சமாளித்தாலும் சாக்சி விடுவதாய் இல்லை என்பது முகத்தில் தெரிகிறது. லாஸ்வியாவுடன் விசாரணை என மொக்கை போட, கவின் மீதான காதலை மெல்ல வெளிக் கொண்டு வருகிறார் லாஸ்லியா.

வெயிலில் கிடக்கிறார்களே என சேரன் பொங்கி, எனக்கு இந்த விளையாட்டே புரியலை என சேரன் பேச, கவின் விளையாடத்தான் வேண்டுமெனச் சொல்ல, சேரன் எனக்கு எதுவும் வேண்டாமென கேமரா முன் சொல்கிறார்... மீரா பொங்கல் வைக்க, உங்கிட்ட பேசலைம்மா என அடக்கிவிடுகிறார். சரவணனுக்கு சேரன் மீது ஏதோ வாய்க்காத் தகராறு போல... மீராவுக்கு அடைக்கலம் கொடுக்கிறார்.

விளையாட்டு வேண்டான்னு யாரும் சொல்ல முடியாதுன்னு வனிதா பிட்டுப் போடுகிறார். கவினும் கொல்லப்பட,  மீரா இன்ஸ்பெக்டர் ஆக, அதன் பின் விளையாட்டு முடிவுக்கு வருகிறது.  வனிதாவுக்கு பிக்பாஸ் பாராட்டு மழையே பெய்கிறார். பெரிய நடிகை என சக பயணிகள் புகழாரம் வேறு... அதான் பார்த்தோமே சினிமாவில் நடிப்பை... நல்ல விளையாண்ட இருவர் என பிக்பாஸ் கேட்க, சாக்சி மற்றும் வனிதா சொல்லப்பட, மோகன் பொங்கிட்டார் எனவே மோகன் பெரியவர்... சாக்சி புரிஞ்சிப்பா என சேரன் நிலையை மாற்றி, மோகன் வனிதா என்றாக, மீண்டும் ஒருவருக்கு வாய்ப்பு எனும்போது சாக்சி அதில் இடம்பெற, மூவருக்கும் இந்த வார தலைவர் பதவியில் நிற்க போட்டி வைக்கப்படும் என்று சொல்லிவிடுகிறார் பிக்பாஸ்.

அப்புறம் நல்லா விளையாடாத ரெண்டு பேர் என்றதும் சேரன் நான் விளையாடலைன்னு போட்டி முடியும் ஒரு மணி நேரத்துக்கு முன்னர் சொன்னேன் எனவே நான் என முன்னிற்க, தலைவர் அபிராமி சொல்ல வேண்டிய சூழலில் சேரன் மற்றும் சரவணன் என்று சொல்ல, சரவணன் நான் ஏன் விளையாடலைன்னு கேட்டு பிரச்சினையை ஆரம்பித்தார். விளக்கம் சொல்லியும் கேட்கவில்லை... இருவருக்கும் ஜெயில் என்னும் போது அபிராமியை அடிக்க வனிதா இதைக் கையில் எடுத்து சரவணன் விளையாண்டார்... கவின்தான் சரியா விளையாடலை என ஆரம்பித்து வைக்க, ஆளாளுக்கு நான் போறேன் என முன்னிற்க, லாஸ்லியா நான் போறேன் என்று சொன்ன போது வனிதா காளியாகிவிட்டார். உன்னைய அப்படி ஒண்ணும் நல்லவளாக நான் விடமாட்டேன்னு குதிச்சிட்டார். புள்ளைக்கு கோபம் வந்து பாத்ரூம்க்குள்ள போயிடுது... அங்கயும் மச்சான்... மச்சான்னு பொயிட்டான் மாப்பிள்ளை கவின்... எங்கிட்ட கதைக்காதே எனச் சொல்லிச் செய்யும் செய்கையில் காதல் வழிய, கவினுக்கு என்ன சொல்வதென்றே தெரியவில்லை. அபிராமி நேரடியாகக் கேட்டும் கவின் ஒத்துக் கொள்ளவில்லை என்றதும் அழகா ஒதுங்கிடுச்சு... ஆனா சாக்சி மற்றும் லாஸ்லியா குடுமிப்பிடி சண்டை விரைவில் இருக்கும்ன்னுதான் தோணுது.

சேரனும் கவினும் ஜெயிலுக்குள்... லாஸ்லியா கவினுக்காக உருகுது... மீரா தன்னைப் பற்றிச் சொல்லச் சொல்ல... சாண்டி நீ கிழம்ன்னு பாட, தர்ஷனோ ஒரு படி மேலே போய் அழகான பச்சோந்தி என்கிறான்... விடுவாளா... வாயால் வடை சுடும் மீரா... தனியே பிடித்து எப்படிச் சொன்னேன்னு கேள்வி கேட்க, தர்ஷன் சூப்பராய் விளக்கம் தர்றான்... ரொம்பப் பேச செருப்பால அடிப்பேன்னு வேற சொல்லிட்டு சாரின்னு சொல்லிடுறான்.

சரவணன் சேரன் சொன்னதை யாருமே சொல்லலை என்னைச் சொன்னபோது எல்லாரும் பேசாம நின்னீங்க... அவங்க அவங்க பாதுகாப்பா விளையாடுறீங்க இனி எவனும் எங்கிட்ட வராதே... அவனவன் அவனவன் விளையாட்டைச் சரியா விளையாடு... நான் இந்த டாஸ்கில் விளையாடிக்கிட்டுத்தான் இருந்தேன் எனப் புலம்பினார். இது ஒரு கேம் ஷோதானே... இதில் விளையாடுவதுதான் வேலை என்பது தெரியாதா செவ்வாழை... இதுல சேரனைச் சொல்லலைன்னு வேற கடுப்பு... அந்தாளுதான் கேமரா முன்னாடி சொல்லிட்டாரு... அப்புறம் நாந்தான் சொன்னேன் என ஜெயிலுக்குப் போகவும் முதல் ஆளாக் கை தூக்கிட்டாரு... இதுக்கு மேல உங்களுக்கு என்ன வேணும் சித்தப்பு... வாய்க்காத் தகராறுன்னாலும் இப்படி வாய்க்கு வந்ததைப் பேசுறதா... யோசி சித்தப்பு... உனக்குத் தூபம் போடுற மீராக்கிட்ட ஜாக்கிரதையா இரு சித்தப்பு... சூதனமாப் பொழச்சிக்க... அடுத்த வாரமே மீரா உனக்கு எதிரா நிக்கும்.

மறுநாள் ஆட்டத்துடன் விடிய, லாஸ்லியா பாப்பாத்தி (வண்ணத்துப்பூச்சி) பிடிக்கச் சொல்லிக் கொடுக்கிறேன் என என்னமோ செய்தார். சேரன், கவினுக்கு விடுதலை...  அதென்ன இந்த வாரத் தலைவரை இப்பவே தேர்ந்தெடுக்கிறாங்க...  எப்படியிருந்தாலும் வனிதா காப்பாற்றப்படுவார்... அவர் இல்லைன்னா விஜய் டிவிக்கு டிஆர்பி இல்லை... ஒருவேளை தலைவரானால் தலைவர் என்ற முறையில் நீங்கள் காப்பாற்றப்பட்டீர்கள் என்று சொல்லியிருப்பார்கள். ஆனால் போட்டியில் மோகன் ஓடிப் பார்த்து  ஊக்கப்படுத்தலை... கேலி பண்ணுறீங்க என ஜகா வாங்க, ஓடிப் பார்த்த வனிதா முடியாத கட்டத்தில் இது சரியில்லை... கேமை மாத்து... பிக்பாஸ் என நேரடியாக பிக்பாஸூடன் மோத, பிரச்சினையின் பின்னணியில் தர்ஷன் உங்களுக்காக எப்படி மாத்த முடியும்... அப்பா விளையாண்டு முடியாதுன்ன பின்ன எப்படி மாத்தச் சொல்லுவீங்க என வர, நீ போடா நான் நாட்டாமை மகள் எனப் பேச, பய விட்டு விளாசிட்டான்.... வனிதாவுக்கு செம அடி... மைக்கைக் கழட்டி பிக்பாஸ் கூப்பிடட்டும் என ஆட்டம் போட, வனிதாவின் கட்டுப்பாட்டில் இருந்த ஷெரின் எல்லாம் தர்ஷன் பக்கம். மோத முடியாத சூழலில் என் காண்ட்ராக்ட் வேற உன்னோட காண்ட்ராக்ட் வேற, தமிழ்நாட்டுக்குள்ள இருந்த என்ன வேணுமின்னாலும் பேசாதேன்னு ஏதேதோ உளறுச்சு வனிதாம்மா... பாவம். தர்ஷன் அடிச்ச அடியெல்லாம் எல்லைக் கோட்டுக்கு வெளியே போன சிக்ஸர்தான். செம அடி.

பிக்பாஸும் கூப்பிடலை... எவனும் நமக்குச் சப்போர்ட் பண்ணலைன்னு அபியோட நீதானே தலைவர்ன்னு அம்மணி மோத ஆரம்பிச்சிருச்சு... பாவம்  இந்த மூணு வாரமா யாரு தலைவருன்னாலும் அம்மணிதான் எல்லாம் பேசுது... செய்யுது... அப்புறம் நீதானே தலைவருன்னு மல்லுக்கு நிக்கிது. சேரன் அபிராமியைக் காப்பாற்றி, தர்ஷனிடம் நீ கேட்டது சரிதான்... பட் அதை எப்பக் கேட்டிருக்கணும் என்றால் என விளக்கம் கொடுத்து உன்னோட குரல் உயரும் போது ரொம்பச் சப்தமா இருக்குன்னு சொல்லி, சமாதானம் பண்ணினார். இந்த விஷயத்தில் சேரன் சமாதானத்துக்கு இறங்கினாலும் சொன்ன விளக்கம் தேவையற்றது. சரவணன் ஒதுங்கியே இருந்தார். வனிதாவிடம் பேசப்பயம் போல... மோகன் கூட மற்றவர்களிடமே புலம்பினார் வனிதாவிடம் கப்சிப்.

சாக்சி தலைவராக்கப்பட்டார்... வேலைக்கான ஆட்கள் பிரிப்பதில் புதிய குழுத் தலைவர்களைச் சொன்ன போது மீராவின் கீழே வனிதா, அப்பவே வனிதாவின் முகம் சுருங்கியது. சாப்பாடுத் தலைவர் சரவணன் தலைமையில் கவின், மது என ஆனபோது அந்தக் குழுவுக்குள் தான் வந்து கிச்சனில் நின்று அதிகாரம் செய்யலாமென சாக்சியிடம் கேட்க, அவரும் நீங்க நல்லா சமைச்சிருவீங்களான்னு சரவணனிடம் கேட்டு ஒருத்தரை இங்க மாத்தி விடுறேன் என்றதும் நாங்களே பாத்துப்போம் எனச் சரவணன் அழகாக கட்டையைப் போடுகிறார். அவருக்குத் தெரியும் யார் வருவார்கள் என.

மது சாமி கும்பிட நேரம் வேண்டும் என்றதும் மூனறைக்கு எந்திரி, குளி, சாமி கும்பிடு, ஆறே முக்காலுக்கு கிச்சனுக்கு வா என்று சரவணன் சிரிக்காமல் சொல்லி, நான் சமைச்சிருவேன்... நீ பழகிக்கிட்டு வீட்டுல போயி புருஷனுக்குச் சமைச்சிப் போடு என்றும் குத்தலாய்ச் சொல்ல, நான் சமைப்பேன் என மது கத்திக் கொண்டிருந்தார்.

லாஸ்லியா - கவின் - சாக்சி : மச்சான் சும்மா ஜாலியாத்தான் பழகினேன்னு அவன் சொன்னாலும் வரும் வாரங்களில் குழாயடிச் சண்டை களை கட்டும்.

வனிதாவுக்கு தர்ஷன் வைத்த ஆப்பில் பிக்பாஸ் கூட வனிதாவை வைத்துக் கல்லாக் கட்டலாம் என்ற கனவை உடைத்து வீசியிருப்பார்... பயபுள்ள சிங்கத்தை அப்படியே சாச்சுப்புட்டான்.

ஷெரின் - தர்ஷனுடன் ரொமான்ஸ் பண்ணுது... இது ஜாலிக்கா... இல்லை இருவருக்குள்ளும் கெமிஸ்ட்ரி, கணிதம், உயிரியல்ன்னு எல்லாம் இருக்கான்னு போகப்போகத் தெரியும்.

முகன் - அபிராமி காதல் ஒரு பக்கம் சத்தமில்லாமல் நகருது.

மீரா ஆபத்தானவர் என்பதை எல்லாரும் உணர்ந்தே வைத்திருக்கிறார்கள்.

மது மிகமிக ஆபத்தானவர் என்றாலும் தமிழ் என்ற மூன்றெழுத்து முட்டாள்தனமே அவரை இறுதிவரை வாக்களித்துக் காப்பாற்றும். பிரச்சினைகளில் 'ஃ' க்கில் மீரா, வனிதாவுடன் இவரும் உண்டு.

சேரனும் சரவணனும் கண்டிப்பாக மோதும் நாள் வரும்.

இந்த வாரம் மோகனே அனுப்பப்படுவதற்கான வாய்ப்பு அதிகம்.

சாண்டி - வைகைப்புயல்தான்... சிரிக்க வைத்துக் கொண்டே இருக்கிறார்.

ரேஷ்மா எப்போது வனிதாவை விட்டு விலகுவார் என்பது புதிரே...

இன்று கமல் வருவார்... 'ஃ'- நாயகிகளான வனிதா, மீரா, மது வீட்டுக்குள் வேண்டும் என்பதாலும் சரவணன் தேவை என்பதாலும் மோகனே போகக் கூடும்.

வரும் வாரங்கள் சுவராஸ்யமாக இருக்கும் என்று நம்புவோம்.

பிக்பாஸ் தொடரும்.
-'பரிவை' சே.குமார்.

வெள்ளி, 12 ஜூலை, 2019



சினிமா : கும்பளங்கி நைட்ஸ் (மலையாளம்)



'சரியான இடத்துக்குத்தான் வந்திருக்கீங்க... இங்க இனி அழிஞ்சி போறதுக்கு எதுவும் இல்லை' என்ற வசனம் சக்தியிடம் பாபி சொல்வதாய் படத்தில் வரும்... இந்த வசனமே அந்த வீட்டைப் பற்றிச் சொல்லிவிடும். அப்படியானதொரு வீடு... அதில் போனி, சாஜி, பாபி, பிராங்கி என நாலு சகோதரர்கள்... மூணு பேருக்கு ஒரு அம்மா... மூணு பேருக்கு ஒரு அப்பா... அப்பா இறந்து போக, அம்மா இவர்களை விட்டுப் பிரிந்து தனியே இருக்கிறார். பிராங்கி ஹாஸ்டலில் தங்கிப் படிக்கிறான். விடுமுறையில் வீட்டுக்கு வெறுப்போடுதான் வருகிறான். இவர்களுக்குள் எந்த ஒட்டுதலும் இல்லாத வாழ்க்கையை, எது ஒட்டுதலான வாழ்க்கையாக மாற்றுகிறது என்பதே கதை.

கும்பளங்கி மீன் பிடித் தொழிலையும் சுற்றுலாவையும் ஆதாரமாகக் கொண்ட அழகிய ஊர். ஊரைப் போலவே அந்த கதவில்லாத வீடும் நம்மை ஈர்த்துக் கொள்கிறது... அப்ப அந்த வீட்டில் இருக்கும் மனிதர்கள் ஈர்க்கவில்லையா..? நிச்சயமாய் படம் நகர... நகர... அவர்கள் நால்வர் மட்டுமின்றி, அவர்களுடன் சம்பந்தப்பட்ட அனைவரும் நம்முள் சிம்மாசனம் இட்டு அமர்கிறார்கள்.

வாய் பேச முடியாத போனிக்கு கடைக்குட்டி பிராங்கி மீது அதிக நேசம்... சாஜிக்கும் பாபிக்கும் ஆரம்பம் முதலே அடிதடிதான்... கட்டி உருளும் சண்டை அடிக்கடி நிகழும்... பிராங்கி மட்டும் இருவருடனும் பேசினாலும் சாஜிக்கு மூவரையுமே பிடிப்பதில்லை. இப்படியான இவர்களின் வாழ்க்கைக்குள் பெண்கள் வந்தால்...?

கறுப்பினப் பெண்ணான நைலா (ஜாஸ்மின்) கும்பளங்கிக்கு சுற்றுலா வந்து  போட்டோ எடுப்பதற்காக சில நாள் தங்குகிறார். அப்போது அவருக்கும் போனிக்கும் (ஸ்ரீநாத் பஸி) காதல்... ஒரு பிரச்சினையின் காரணமாக வீட்டிற்கே கூட்டி வந்து தங்க வைக்கப்படுகிறார். 

பாபி (ஷான் நிகாம்) பள்ளியில் லெட்டர் கொடுத்தவளான பேபியை (அன்னா பென்)  நண்பனின் காதலி மூலமாகப் பார்த்து லவ் பண்ண ஆரம்பிக்கிறார். கன்னத்தில் விழும் குழியின் அழகில் சொக்க வைக்கிறார் நிகாம். முத்தப் பிரச்சினைக்கு காதலே வேண்டான்னு விலகி விலகி ஓடுபவர் திடிரென முழுவதுமாய் காதலில் விழுகிறார்.

பள்ளி நண்பர்களை தன் வீட்டிற்கு கூட்டி வர முடியாத நிலையில் இருக்கும் பிராங்கி (மேத்யூ தாமஸ்) தன் சகோதரர்கள் சண்டையில் ஒதுங்கியே இருக்கிறான். போனிக்கு மட்டுமே பிராங்கி மீது பிரியம் அதிகம். கூடப் பிறந்த அண்ணனான பாபி கூட அவனுடன் ஒட்டுதலாய் இருப்பதில்லை. அம்மாவின் நினைப்பில் வாழும் ஒரே ஜீவன் அவன் மட்டுமே.

சாஜிக்கு (ஷௌபின் ஷஹிர்) ஓசிக்குடி கதாபாத்திரம்... தான் உதவி செய்த தமிழன் முருகனின் (ரமேஷ் திலக்) சம்பாதிப்பதை எடுத்துக் குடிக்கும் மனிதன். தன்னால்தான் ரமேஷ் திலக் செத்தான் என்பதால் வயிற்றுப் பிள்ளையான சக்திக்கு (ஷீலா ராஜ்குமார்) உதவி தன்னுடைய வீட்டிற்கே கூட்டி வருகிறான்.

Image result for kumbalangi nights images

உறவுகள் என்று சொல்லிக் கொள்ள பெரியவர்கள் இல்லாத வீட்டில்... நாலு பேரும் நாலு விதமான மனநிலையில் இருக்கும் இடத்தில்... முழுவதும் அறியாத இரண்டு பெண்கள் இருத்தல் சரியல்ல என்பதே பாபியின் எண்ணமாய் இருக்கிறது... ஆரம்பத்தில் முரண்டு பிடிப்பவன், அந்தப் பெண்களுக்காக அம்மாவை மீண்டும் சில நாள் வீட்டுக்கு வரச் சொல்லிக் கூப்பிட்டும் வர மறுத்த நிலையில் 'நீ சரியான இடத்துக்குத்தான் வந்திருக்கே' என சக்தியிடம் சொல்லுமிடத்தில் அவர்கள் அங்கே தங்கலாம் என்ற எண்ணத்துக்கு வருகிறான்.

இந்த நாலு பேருடன் ரெண்டு பெண்களைச் சேர்த்துவிட்டால் போதுமா...? வெவ்வேறு மனநிலை கொண்ட இந்த நாலு சகோதரர்களையும் சேர்க்கும் மையப்புள்ளி வேண்டாமா...? அது எங்கிருக்கிறது...? எப்போது வைக்கப்படும்...?

பேபியின் அக்கா கணவன் ரூபத்தில் வைக்கப்படுகிறது மையப்புள்ளி... 

அந்தப் புள்ளிதான் நடிப்பு அரக்கன் பஹத் பாசில்.

மீசை சரி செய்யும் போது குளிக்கையில் மனைவியோ / கொழுந்தியாளோ எடுத்து ஒட்டிய ஸ்டிக்கர் பொட்டை பிளேடால் தள்ளித் தண்ணீர் திறந்து விடும்போதே உணர முடிகிறது இவர்தான் வில்லன் என்பதை... உதடுகள் மட்டுமல்ல அவரின் கண்களும் சிரிக்கின்றன கள்ளத்தனமாய்.

படம் முழுவதும் ரொம்பச் சாதுவாய் காய் நகர்த்தும் குரூர வில்லன்... ஆரம்பத்தில் கிரிக்கெட் விளையாடுங்கடா... வலைகட்டி என புட்பாலை எடுக்க ஓடிவந்த சிறுவனிடம் சொல்லும் போது வண்டியின் ஆக்ஸிலேட்டரைத் திருகி மனைவியைப் (கிரேஸ் ஆன்டனி) பயமுறுத்தி இதுக்குப் பயப்படுவியா எனச் சிரித்து, கொழுந்தியாளிடம் செய்யும் வில்லத்தனம், சாஜி, பாபி, மாமியார் என எல்லாரிடமும் நடந்து கொள்ளும் விதம்... வீட்டுக்குள் மீண்டும் வந்து விழுந்த புட்பாலை தேங்காய் உரிக்கும் கம்பியில் குத்தி வைப்பது என மெல்ல மெல்ல குரூர முகம் காட்டி... இறுதிக்காட்சியில் ராட்சஸ ஆட்டம்... செம. 

இந்த மனிதருக்கு நடிக்கச் சொல்லியா கொடுக்க வேண்டும்... லேசான புன்னகை... சிரிக்கும் கண்கள்... ஆஹா... செம... நம்ம ரகுவரனை இந்தச் ஷம்மி கதாபாத்திரத்தில் பார்ப்பது போல் இருந்தது. இவரில்லை என்றால் கும்பளங்கி நைட்ஸ் சொல்லிக் கொள்ளும்படியாக இருந்திருக்காதோ எனத் தோன்றியது. மொத்தப் படத்தையும் அசால்ட்டாய் தூக்கி நிறுத்துகிறார். நடிப்புக்காக எந்த எல்லையும் தொடும் கலைஞன்... இன்னும் சிறப்பாகத் தொடரட்டும்.

ஷான் காதலின் பின்னே, ஷௌபின்னிடம் உதவி கேட்கும் இடத்தில் 'சேட்டன்னு கூப்பிடு' எனச் சொல்ல, ரொம்ப யோசித்து ஷான் 'சேட்டா' என்றதும் அவர் சிரிக்கும் இடம்... ஆஹா... மனுசன் சிரிப்பால் ஈர்க்கிறார்... எத்தனை முறை பார்த்தாலும் அலுக்கவே அலுக்காது அந்தச் சிரிப்பும்... காட்சிப்படுத்தலும்... தம்பிக்காக பஹத்திடம் மென்னு முழுங்கிப் பேசுவது...  ஷீலாவிடம் ரொம்ப அன்பாய் நடந்து கொள்ளுதல் என மனிதர் கலக்கியிருக்கிறார். ஷௌபின் நடிப்பு எப்பவுமே பிடிக்கும்... இதில் இன்னும் கூடுதலாய். நல்லதொரு கலைஞன்.

ஷானுக்காக சகோதர்ரகள் இணைகிறார்கள்... காதலைச் சேர்த்து வைத்தார்களா என்பதைச் சொல்வதே கதையின் முடிவு. 

Image result for kumbalangi nights images

பஹத் யார் என்பதை இறுதிக்காட்சியே விலக்கினாலும் குரூரத்தனத்துக்குள் வேறு ஏதோ ஒன்று இருக்கிறது என்பதை ஆரம்பம் முதலே அவர் வரும் காட்சிகளில் சொல்லிக் கொண்டே இருக்கிறது திரைக்கதை.

பம்மிப் பம்மிப் போகும் கிரேஸ், அன்னாவிடம் பஹத் பேசும் இடத்தில் கொசுப்பேட்டை உடைத்து உடைந்து எழுவது செம. கதையில் திருப்பம்... 

பஹத்தின் முன்னே ஸ்ரீநாத்துக்கு இதழில் முத்தம் கொடுத்து இப்ப என்ன பண்ணுவே என்பதாய் திமிர் காட்டும் ஜாஸ்மின், முத்தம் கொடுக்கப் பயந்து பயந்து கொடுக்கும் அன்னா, பயத்தைத் தூக்கி வீசி எழும் கிரேஸ், கணவனை இழுந்து இன்னொரு வீட்டில் வந்து இருப்பதை விரும்பாமல் நான் ராசியில்லாதவள்... சபிக்கப்பட்டவள் எனச் சொல்லும் ஷீலா என நாலு பெண்களும் நடிப்பில் குறை வைக்கவில்லை. ஷீலாவை இன்னும் பயன்படுத்தியிருக்கலாம் என்றே தோன்றியது இருப்பினும் பெருங்கூட்டத்துக்கான தீனியில் தனக்கான தீனியை சரியாகவே சாப்பிடிருக்கிறார் என்றே சொல்லவேண்டும்.

பைஜூ ஜான்சன், அம்பிகா ராவ், சூரஜ், ரியா சயிரா என படத்தில் நடித்த எல்லாருமே அருமையாக நடித்திருக்கிறார்கள்.

தமிழன் கதாபாத்திரம் என்றால் வீட்டு வேலைக்காரி / காரன், சலவைத் தொழிலாளி என்பதை வழக்கமாக மலையாளிகள் வைப்பதுண்டு. அதே வழக்கம்தான் இதிலும் என்றாலும் ரமேஷ் திலக் மறைவுக்குப் பின் நிறைமாத கர்ப்பிணியான ஷீலாவின் காலில் விழுதல், அவரைத் தன்னோடு வைத்துக் கொள்ளல் என வித்தியாசப் படுத்திருக்கிறார்கள். அதற்காகப் பாராட்டலாம்.

எந்த இடத்திலும் தொய்வே இல்லாத திரைக்கதை (ஷ்யாம்)...  அழகான பின்னணி இசை(சுசின் ஷ்யாம்)... கும்பளங்கியை பகலிலும் இரவிலும் அழகாய்க் காட்டும் ஒளிப்பதிவு (ஷைஜூ காலித்), சிறப்பான எடிட்டிங் (ஷைஜூ ஸ்ரீதரன்)என எல்லாமே கலக்கலாய்...

ஷியாம், திலீஷ் போத்தனுடன் பஹத்தும் நஸ்ரியாவும் இணைந்து தயாரித்திருக்கிறார்கள். படத்தை இயக்கியிருப்பவர் மது சி.நாராயணன்.

மீன் பிடித்தல், படகுகள், சுற்றிலும் நீர் என மிக அழகாக இருக்கிறது அந்த வீடு... விளக்கொளியில் நம்மை ஈர்க்கிறது.

ஆஹா... ஓஹோன்னா படத்துல குறையே இல்லையா...?


இருக்கே.... ஜாஸ்மின் சுற்றுலா வந்தவர், இங்கே தங்குதல்... அதுவும் திருமணம் செய்து கொண்டு தங்குதல் என்பது சற்றே உறுத்தல்.

ஷீலா கணவனை இழந்தவள், உன்னை அவர் அண்ணன்னு சொல்லிக்கிட்டே இருப்பார் என்பவர், அந்த வீடு அவரைச் சகோதரியாக ஆக்கிக் கொண்டாலும் சட்டென உடன் வருதல் சற்றே உறுத்தல்.

பாபியின் குணம் காதலிலும் சரி வீட்டிலும் சரி சட்டென மாறுதல் சற்றே உறுத்தல்.

உறுத்தல் எல்லாம் இருக்கட்டும் கதவில்லா வீட்டில் முரண்பாடுள்ள மனிதர்களைத் தாராளமாகப் பார்க்கலாம். கும்பளங்கி நைட்ஸ் தீபாவளி இரவாய் தித்திக்க வைக்கும்.
-'பரிவை' சே.குமார்.